អ្នកធ្វើការលើកស្ទួយសិទ្ធិស្ត្រីរិះគន់ការចែកចាយថតរូបអាក្រាតនៃសពអ្នកចម្រៀង សាន ស្រីឡៃ
អ្នកប្រើប្រាស់បណ្ដាញសង្គមហ្វេសប៊ុក (Facebook) និងអ្នកធ្វើការងារលើកស្ទួយសិទ្ធិស្ត្រីរិះគន់ចំពោះទង្វើអសីលធម៌ របស់អ្នកដែលបានថតរូបអាក្រាតនៃសពរបស់អ្នកចម្រៀង សាន ស្រីឡៃ ចែកចាយក្នុងបណ្ដាញសង្គម។
ពួកគេទាមទារអោយសមត្ថកិច្ចស្រាវជ្រាវរកជននោះមកទទួលខុសត្រូវចំពោះទង្វើអសីលធម៌នោះ។
អ្នកការពារសិទ្ធិស្ត្រី និងក្រុមអ្នកប្រើប្រាស់បណ្ដាញសង្គមស្នើអោយមានការដាក់ទណ្ឌកម្ម ឬបណ្ដេញពីការងារប្រសិនបើអ្នកថតរូប និងចែកចាយរូបអាក្រាតនៃសពរបស់អ្នកចម្រៀង សាន ស្រីឡៃ នោះគឺជាមន្ត្រីនគរបាលផ្នែកកោសល្យវិច័យសាកសព។
អនុប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា និងជាសមាជិកនៃបណ្ដាញទីក្រុងសុវត្ថិភាពសម្រាប់ស្ត្រី អ្នកស្រី អ៊ូ ទេព ផល្លីន អោយដឹងថា នេះជាការរំលោភបំពានទៅលើសេចក្ដីថ្លៃថ្នូររបស់សព និងក្រុមគ្រួសាររបស់សព។
សារព័ត៌មានក្នុងស្រុកបានផ្សព្វផ្សាយនៅថ្ងៃទី១៨ ខែ តុលា ថា មានការចែកចាយរូបថតអាក្រាតរបស់សពនាង សាន ស្រីឡៃ នៅក្នុងបណ្ដាញសង្គម ក្នុងចំណោមមន្ត្រីនគរបាលជារបៀបលេងសើចសប្បាយ។ សារព័ត៌មានក្នុងស្រុកបានរៀបរាប់ថា រូបថតនោះអាចត្រូវគេថតនៅក្នុងពេលធ្វើកោសល្យសាកសព។
អ្នកចម្រៀង សាន ស្រីឡៃ មានវ័យ២៣ឆ្នាំ ត្រូវអតីតស្វាមីបាញ់សម្លាប់ នៅក្នុងហាងកែសម្ផស្សមួយក្នុងរាជធានីភ្នំពេញកាលពីរសៀលថ្ងៃទី១៦ ខែ តុលា ហើយបុរសជាប្ដីក៏បានបាញ់សម្លាប់ខ្លួនឯងភ្លាមៗដែរ។
អ្នកប្រើប្រាស់បណ្ដាញសង្គមហ្វេសប៊ុក ដែលបានដឹងព័ត៌មានទាក់ទងនឹងការចែកចាយរូបភាពនោះបានរិះគន់អ្នកចែកចាយនឹងថា ប្រសិនបើជាមន្ត្រីគួរតែត្រូវដកតួនាទី។ អ្នកប្រើហ្វេសប៊ុកមួយចំនួនសរសេរប្រហាក់ប្រហែលគ្នាថា មន្ត្រីនោះគួរតែត្រូវបកសក្ដិចោលព្រោះល្មើសក្រមសីលធម៌វិជ្ជាជីវៈ និងក្រមសីលធម៌ខ្លាំងបំផុតក្នុងពេលអនុវត្តន៍ការងាររបស់ខ្លួន ព្រោះមុនពេលបានចូលធ្វើប៉ូលិសគឺសុទ្ធតែបានរៀនសូត្រចេះដឹង។
អ្នកសម្របសម្រួលគណៈកម្មាធិការលើកស្ទួយស្ត្រី ក្នុងវិស័យនយោបាយរបស់អង្គការសីលកា កញ្ញា សេង រាសី លើកឡើងថា នេះមិនមែនជាករណីលើកទី១ទេ ករណីបែបនេះតែងកើតឡើងជាញឹកញាប់ទៅស្ត្រី ជាពិសេសស្ត្រីដែលរងគ្រោះដោយអំពើហិង្សា មានករណីរំលោភផ្លូវភេទជាដើម គឺរូបភាពរបស់ស្ត្រីរងគ្រោះតែងត្រូវគេដាក់បង្ហាញ ដោយមិនបានគិតពីភាពរងគ្រោះរបស់ស្ត្រីឡើយ។
ទាក់ទិននឹងករណីនេះ អគ្គស្នងការរងនគរបាលជាតិ លោក ជួន សុវណ្ណ បានប្រាប់សារព័ត៌មានក្នុងស្រុកថា កំពុងស្រាវជ្រាវចំពោះមន្ត្រីនគរបាលពាក់ព័ន្ធទាំងនោះ ប្រសិនបើមានករណីបែបនោះមែនលោកនឹងចាត់វិធានការតាមច្បាប់ ព្រោះវាបានធ្វើអោយប៉ះពាល់ដល់កិត្តិយសរបស់សព វិជ្ជាជីវៈ និងក្រមសីលធម៌នគរបាល៕
ប្រភព ៖ វិទ្យុអាស៊ីសេរី
0 ความคิดเห็น: