អ្នកស្រី ពឿង លួង លើកឡើងថា កាលពីម្សិលមិញ ក្រុមហ៊ុនបានយក កម្លាំងសន្តិសុខចំនួន ២០ នាក់ និងគ្រឿងចក្រចំនួន ២ គ្រឿង មកឈូសឆាយដំណាំ និងដីភូមិរបស់គាត់ ទាំងមិនទាន់បានដោះស្រាយសំណងជាមួយពួកគាត់។ អ្នកស្រីបន្តថា កន្លងមក ម្ចាស់ក្រុមហ៊ុនតែងតែបង្ខំឲ្យទទួលយកសំណង។
អ្នកស្រីថា៖«ខ្ញុំមិនដឹងធ្វើយ៉ាងម៉េច សុខចិត្តនៅលើផ្ទះប្ដូរស្លាប់នៅហ្នឹងម៉ង់ បើសិនជាមិនឲ្យសំណងដល់តម្លៃ សុខចិត្តស្លាប់នៅហ្នឹង»។
លោកថា៖«វាគំរាមថា បើសិនជាយើងមិនចូលទៅជួបវាទេ វាអត់មានមកលើកទី២ ទេ វាយកគ្រឿងចក្រមកឈូសហើយ វាបង្ខំឲ្យយើងយកសំណងមិនសមរម្យ។ ខ្ញុំមិនយកទេ ទទួលយកទាល់តែសំណងនឹងសមរម្យរបស់ខ្ញុំ បានខ្ញុំទៅបាន បើមិនអញ្ចឹងខ្ញុំមិនទៅជាដាច់ខាត ដីខ្ញុំ ៧ ហិកតា ហើយមានដំណាំពេញទាំងអស់»។
អ្នកទាំងពីរថ្លែងថា បើមានការឈូសឆាយជាថ្មីទៀត ពួកគេត្រៀមដុតបំផ្លាញគ្រឿងចក្រ និងតតាំងទោះស្លាប់ខ្លួនក៏ដោយ។
មេឃុំកោះស្ដេច លោក សុខ ចេង មានប្រសាសន៍ថា លោកកំពុងដោះស្រាយជាមួយក្រុមហ៊ុន ។
អគ្គនាយករងក្រុមហ៊ុនញូញៀន លោក ជាំង ឡាង ប្រាប់ថា ជាប់រវល់មិនបានឆ្លើយតបករណីនេះទេ។
រដ្ឋាភិបាលបានផ្ដល់ដីសម្បទានសេដ្ឋកិច្ចឲ្យក្រុមហ៊ុន ញូញៀន ឌឹវើលុបមែន គ្រុប កាលពីថ្ងៃទី៩ ខែឧសភា ឆ្នាំ២០០៨ មានផ្ទៃដី ៣ម៉ឺន ៦ពាន់ហិកតារ នៅស្រុកបុទុមសាគរ និងស្រុកគីរីសាគរ ខេត្តកោះកុង ដើម្បីធ្វើការអភិវឌ្ឍពាណិជ្ជកម្ម និងរមណីយដ្ឋានទេសចរណ៍ស្របតាមស្តង់ដារអន្តរជាតិ។ ដំបូងឡើយប៉ះពាល់ពលរដ្ឋជាង៣០០គ្រួសារ ក្រោយមកមានការដោះស្រាយជាបន្តបន្ទាប់ ហើយនៅសល់តែ១០គ្រួសារទៀតដែលមិនទាន់ទទួលសំណង។ VOD
0 ความคิดเห็น: