សយ សុភាព ពាលខ្លៅរឿងការទូត នៅតែមិនរៀងចាល ប្រើសំដីអសុរោះគូថវាទ វាយប្រហារលោក លោក សម រង្ស៊ី រឿងបំពេញទស្សនកិច្ចនៅប្រទេសជប៉ុន !

គិតទៅលោក សយ សុភាព នៅតែមិនរៀងចាល។ កាលពីឆ្នាំ២០១៣ គាត់ហ៊ានស្បថថាបើលោក សម រង្សុី បានចូលស្រុកខ្មែរវិញ គាត់នឹងកោសក់ ទីបំផុតលោក សម រង្សុី បានចូលស្រុកវិញ តែគាត់ធ្វើព្រងើយទាំងគ្មានក្តីអៀនខ្មាស់។ ក្នុងអត្ថបទកាសែតរបស់ខ្លួន កាលពីថ្ងៃទី ១០ មេសា ២០១៨នេះ ក្នុងខណៈពេលលោក សម រង្សុី ទៅបំពេញទស្សនកិច្ចនៅប្រទេសជប៉ុន លោក សយ សុភាព បានហៅលោក សម រង្សុី ពេញៗមាត់ថា ទណ្ឌិត ទៅបំពេញទស្សនកិច្ចនៅជប៉ុន។

គាត់គ្មានក្តីអៀនខ្មាស់ទាល់តែសោះ ហើយបែបគិតថាពលរដ្ឋខ្មែរល្ងង់ខ្លៅដូចគាត់ ជាពិសេសប្រទេសជប៉ុនពិតជាអត់ចេះពិធីការទូតអ្វីបន្តិចទាល់តែសោះ ដែលអនុញ្ញាតអោយទណ្ឌិតមានទោសរាប់មិនអស់ដូចលោក សម រង្សុី ទៅចូលក្នុងប្រទេសរបស់គេ។

ប្រទេសណាក៏ដូចប្រទេសណាដែរ គេមិនអនុញ្ញាតអោយអ្នកមានទោសពិតប្រាកដចូលទឹកដីគេទេ ហើយម្យ៉ាងទៀត លោក ហ៊ុន សែន ដាក់ទោសលោក សម រង្សុី រាប់មិនអស់ទេ តែរហូតមកដល់ពេលនេះ ម៉ោងនេះ លោក ហ៊ុន សែន មិនដែលហ៊ានទៅពឹងពាក់ប៉ូលីសអន្តរជាតិអោយចាប់លោក សម រង្សុី បញ្ជូនមកកម្ពុជាវិញសោះ មានតែគិតចង់ចំណាយលុយដែលជាបំណុលគេ ប្រើចារកម្មរបស់ខ្លួន ទៅតាមចាប់លោក សម រង្សុី។ បើលោក សយ សុភាព ពិតជាមានសតិគ្រប់គ្រាន់មែន គាត់អាចយល់រឿងនេះច្បាស់ណាស់។ (Khmer Leaking News)

គូសបញ្ជាក់៖ លោក សម រង្សី ទៅជប៉ុនដើម្បីឲ្យជប៉ុនជួយអន្តរាគមន៍រកដំណោះស្រាយនយោបាយខ្មែរ

លោក សម រង្ស៊ី មេដឹកនាំចលនាសង្គ្រោះជាតិ បានធ្វើដំណើរដល់ប្រទេសជប៉ុន កាលពីថ្ងៃទី១០ ខែមេសា ដើម្បីឲ្យស្វែងរកអន្តរាគមន៍ពីរដ្ឋាភិបាលជប៉ុន ក្នុងការរកដំណោះស្រាយនយោបាយនៅកម្ពុជាស្របពេលការបោះឆ្នោតកៀកជិតមកដល់ហើយ។ ប្រទេសជប៉ុន កាលពីចុងសប្ដាហ៍មុនបានបញ្ជាក់ជំហរច្បាស់លាស់របស់ខ្លួន ចង់ឲ្យរបបលោក ហ៊ុន សែន រៀបចំការបោះឆ្នោតជាតិខាងមុខ ឲ្យមានការចូលរួមពីគ្រប់ភាគី។ ម្យ៉ាងទៀត ប្រទេសជប៉ុន ធ្លាប់មានប្រវត្តិជួយអន្តរាគមន៍ រកដំណោះស្រាយបញ្ចប់វិបត្តិនយោបាយនៅកម្ពុជា ដោយជោគជ័យរួចមកហើយ។

លោក សម រង្ស៊ី បានបញ្ជាក់ប្រាប់អ្នកសារព័ត៌មានថា ដំណើរទស្សនកិច្ចរបស់លោក ជាមួយនឹងតំណាងរាស្ត្រគណបក្សសង្គ្រោះជាតិដទៃទៀត រួមមានអ្នកស្រី ជូឡុង សូមូរ៉ា និងអ្នកស្រី មូរ សុខហួរ ផង គឺដើម្បីជាឱកាសបានជម្រាបមន្ត្រីជប៉ុន ដោយផ្ទាល់អំពីការពិត នៃស្ថានការណ៍រំលោភសិទ្ធិមនុស្ស និងប្រជាធិបតេយ្យនៅកម្ពុជា។ លោក សម រង្ស៊ី សង្ឃឹមថា ប្រទេសជប៉ុន នឹងអាចជួយស្តារលទ្ធិប្រជាធិបតេយ្យឡើងវិញ ក្រោយរបបលោក ហ៊ុន សែន បានបំផ្លាញចោលអស់ បន្ទាប់ពីចាប់ឃុំខ្លួន និងចោទប្រកាន់ប្រធានគណបក្សសង្គ្រោះជាតិ លោក កឹម សុខា រម្លាយគណបក្សសង្គ្រោះជាតិ បណ្ដេញអង្គការសង្គមស៊ីវិល និងបិទប្រព័ន្ធផ្សព្វផ្សាយឯករាជ្យនៅកម្ពុជា។ លោក សម រង្ស៊ី សង្ឃឹម ថាប្រទេសជប៉ុន នឹងអាចជួយរកដំណោះស្រាយនយោបាយបាន ដោយសារជប៉ុនជាប្រទេសផ្ដល់ជំនួយធំដល់កម្ពុជា និងមានឥទ្ធិពលក្នុងការរកដំណោះស្រាយនយោបាយខ្មែរនាពេលកន្លងមក ដូចជា កាលពីជាង ២០ឆ្នាំមុន ក្រោយរដ្ឋប្រហារយោធា នៅកណ្ដាលក្រុងភ្នំពេញ ប្រទេសជប៉ុន ក៏បានជួយរកដំណោះស្រាយ ឲ្យអ្នកនយោបាយខ្មែរដែរ។ ម្យ៉ាងទៀត ប្រទេសជប៉ុន ជាប្រទេសចាស់ទុំខាងប្រជាធិបតេយ្យ និងជាប្រទេសគំរូមួយ នៅក្នុងតំបន់អាស៊ី។

ដំណើរទស្សនកិច្ចរបស់លោក សម រង្ស៊ី ទៅជប៉ុននៅពេលនេះ គឺធ្វើឡើងពីរថ្ងៃ ក្រោយរដ្ឋមន្ត្រីការបរទេសជប៉ុនលោក តារ៉ូ កូណូ (Taro Kono) ទើបតែជួបប្រមុខរបបលោក ហ៊ុន សែន កាលពីថ្ងៃទី៨ ខែមេសា នៅកម្ពុជា ដើម្បីផ្ដល់ប្រាក់កម្ចី និងជំនួយសម្រាប់ការអភិវឌ្ឍដល់កម្ពុជា និង មិនភ្លេចដាស់តឿនរបបលោក ហ៊ុន សែន អំពីបញ្ហានយោបាយ ពាក់ព័ន្ធនឹងការបោះឆ្នោតជាតិខាងមុខនេះដែរ។

ទោះបីជារដ្ឋាភិបាលជប៉ុន បានបញ្ជាក់ជំហរច្បាស់លាស់ជាច្រើនលើកច្រើនគ្រា នៅរាល់ជំនួបផ្លូវការជាមួយភាគីកម្ពុជា ថាប្រទេសជប៉ុន ព្រួយបារម្ភអំពីស្ថានការណ៍រំលោភសិទ្ធិមនុស្ស និង លទ្ធិប្រជាធិបតេយ្យនៅកម្ពុជា ហើយតែងតែក្រើនរម្លឹក ឲ្យរបបលោក ហ៊ុន សែន ឲ្យវិលទៅរកការចរចា រវាងអ្នកនយោបាយរបស់បក្សធំៗទាំងពីរ គឺបក្សកាន់អំណាច និងបក្សសង្គ្រោះជាតិ ដើម្បីរកដំណោះស្រាយ ឲ្យបានការបោះឆ្នោតដោយសេរី ត្រឹមត្រូវ និងយុត្តិធម៌យ៉ាងណាក៏ដោយ ក៏លោកនាយករដ្ឋមន្ត្រី ហ៊ុន សែន ព្យាយាមច្រានចោល កិច្ចខិតខំប្រឹងប្រែង ផ្នែកការទូតរបស់ជប៉ុន ក្នុងការស្វះស្វែងរកការផ្សះផ្សាជាតិនេះ។ កាលពីពីរសប្ដាហ៍មុនដំណើរទស្សនកិច្ចរបស់រដ្ឋមន្ត្រីការបរទេសជប៉ុន លោក ហ៊ុន សែន ថែមទាំងហ៊ាន អះអាងជំនួសភាគីជប៉ុន ថាជប៉ុនមិនខ្វល់នឹងរឿងរកដំណោះស្រាយ បញ្ហារំលោភសិទ្ធិមនុស្ស និងប្រជាធិបតេយ្យនៅកម្ពុជានោះទេ៖ «ជប៉ុនគេមិនមកធ្វើរឿងឆ្កួតៗនោះទេ។ ជប៉ុនគេស្គាល់ឯករាជ្យ និងអធិបតេយ្យរបស់ខ្មែរច្បាស់ណាស់»។

ទាំងលោក ហ៊ុន សែន និងក្រសួងការបរទេសកម្ពុជា សុទ្ធតែព្យាយាមច្រានចោលជំហររបស់ជប៉ុន ក្នុងការចង់មានដំណោះស្រាយនយោបាយ នៅមុនការបោះឆ្នោតជាតិ។ របបលោក ហ៊ុន សែន ព្យាយាមលាក់បាំងព័ត៌មាន អំពីជំហរប្រទេសជប៉ុន ដែលតែងតែចង់ឃើញស្ថានភាពប្រសើរជាងនេះ ព្រោះជប៉ុនចង់ឃើញការបោះឆ្នោតមួយ ដោយសេរី ត្រឹមត្រូវ និងយុត្តិធម៌ ដោយមានការចូលរួម ពីគ្រប់គណបក្សនយោបាយ រួមទាំងគណបក្សសង្គ្រោះជាតិផងដែរ។ សេចក្ដីថ្លែងការណ៍ ថ្ងៃទី៩ ខែមេសា របស់ក្រសួងការបរទេសកម្ពុជា ក្រោយជំនួបជាមួយភាគីជប៉ុន កាលពីថ្ងៃទី៨ ខែ មេសានោះ មិនបានរៀបរាប់សូម្បីតែមួយម៉ាត់ អំពីអ្វីដែលរដ្ឋមន្ត្រីការបរទេសជប៉ុន លើកឡើងនៅក្នុងជំនួប ពាក់ព័ន្ធជាមួយនឹងការចង់ឲ្យមានការបោះឆ្នោត ដោយសេរី ត្រឹមត្រូវ និង យុតិ្តធម៌នេះ។ មិនតែប៉ុណ្ណោះ មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន ថែមទាំងរិះគន់អ្នកវិភាគព័ត៌មាន ដែលវិភាគអំពីជំហរការទូតរបស់ប្រទេសជប៉ុននេះ ថាជាជនអគតិថែមទៀតផង។ លោក សុខ ឥសាន ថែមទាំងព្រមានអ្នកវិភាគ ដែលលោកអះអាងថា មានគំនិតអគតិនេះ ថានឹងទទួលរងការថ្កោលទោស និងការចងកំហឹងពីសាធារណមតិទាំងមូលជាក់ជាមិនខាន។

ប៉ុន្តែ ទីប្រឹក្សារបស់ស្ថានទូតជប៉ុនប្រចាំនៅកម្ពុជាលោក ហ៊ីរ៉ូណូរ៊ិ ស៊ុយស៊ូគី (Hironori SUZUKI) បញ្ជាក់ប្រាប់អាស៊ីសេរី តាមសារអេឡិចត្រូនិក កាលពីថ្ងៃទី១០ ខែមេសា ថា លោក តារ៉ូ កូណូ ពិតជាបានបញ្ជាក់ប្រាប់របបលោក ហ៊ុន សែន អំពីជំហររបស់ប្រទេសជប៉ុន ដែលនៅតែទទូចឲ្យរបបនេះ ធានាឲ្យមានការរៀបចំការបោះឆ្នោតជាតិ នាខែកក្កដា ខាងមុខនេះ ដោយធ្វើយ៉ាងណាឲ្យប្រព្រឹត្តទៅឲ្យបានសមស្រប ដើម្បីឆ្លុះបញ្ចាំងឆន្ទៈពិតប្រាកដរបស់ពលរដ្ឋខ្មែរ ដែលជាម្ចាស់ឆ្នោត។ លោក ហ៊ីរ៉ូណូរ៊ិ ស៊ុយស៊ូគី បញ្ជាក់បន្ថែមថា ប្រទេសជប៉ុន គឺជាមិត្តយូរអង្វែងរបស់កម្ពុជា ដែលបន្តជួយកសាងជាតិកម្ពុជា តាំងពីក្រោយបញ្ចប់សង្គ្រាមស៊ីវិល ដើម្បីឲ្យកម្ពុជាមានប្រជាធិបតេយ្យនឹងគេ។ លោកបញ្ជាក់បន្ថែមទៀតថា ទស្សនកិច្ចនេះ គឺធ្វើឡើងតបតាមការអញ្ជើញ របស់លោកនាយករដ្ឋមន្ត្រី ហ៊ុន សែន។

អនុប្រធានគណបក្សសង្គ្រោះជាតិលោក អេង ឆៃអ៊ាង ឯណោះវិញ យល់ឃើញថា ជំហរការទូតច្បាស់លាស់របស់ជប៉ុនប៉ុណ្ណេះ គ្មានអ្វីដែលមន្ត្រីរបបលោក ហ៊ុន សែន មិនយល់នោះទេ ខ្លាចតែធ្វើជាមិនយល់៖ «អ្វីដែលរដ្ឋមន្ត្រីការបរទេសជប៉ុនបាននិយាយ តាមអ្នកនាំពាក្យនិយាយ គឺគេនិយាយច្បាស់ហើយ ជាភាសាការទូត គឺគេចង់ឲ្យបានការបោះឆ្នោត ដោយសេរី ត្រឹមត្រូវ និង យុត្តិធម៌។ ពាក្យហ្នឹងមានន័យគ្រប់គ្រាន់ហើយ គឺគេចង់បានការបោះឆ្នោតមួយ ដែលត្រូវមានគណបក្សសង្គ្រោះជាតិ។ ប៉ុន្តែ គេមិននិយាយចំ ព្រោះបើនិយាយចំទៅ ខ្លាចអាក់អន់ចិត្ត។ ដូច្នេះ រដ្ឋាភិបាលលោក ហ៊ុន សែន គួរយកទៅគិតទៅ។ បើមិនចេះគិតទេ ខ្ញុំជឿជាក់ថា ជប៉ុននឹងមិនគាំទ្រនូវរដ្ឋាភិបាលមួយ ដែលកើតក្រោយការបោះឆ្នោតមួយ ដែលអត់មានការចូលរួមប្រកួត ពីគណបក្សសង្គ្រោះជាតិនោះទេ»។

កាលពីចុងខែមីនា កន្លងទៅនេះ កូនស្រីច្បងរបស់លោក កឹម សុខា និងជាមន្ត្រីកិច្ចការសាធារណៈរបស់គណបក្សសង្គ្រោះជាតិ កញ្ញា កឹម មនោវិទ្យា ក៏បានទៅប្រទេសជប៉ុន និងជួបសមាជិកសភាជប៉ុន ដើម្បីឲ្យជួយរកអន្តរាគមន៍ ដោះស្រាយវិបត្តិនយោបាយខ្មែរនេះដែរ។

គិតមកត្រឹមថ្ងៃនេះ គឺនៅសល់តែ១៩ ថ្ងៃទៀតប៉ុណ្ណោះ ដល់ថ្ងៃចុះបញ្ជីគណបក្សនយោបាយ និង បេក្ខជន ដើម្បីអាចមានសិទ្ធិចូលរួមប្រកួតប្រជែង ក្នុងការបោះឆ្នោតជាតិ នាថ្ងៃទី២៩ ខែកក្កដា ខាងមុខនេះ។ ការចុះបញ្ជីនេះ មានរយៈពេលតែ ១៥ថ្ងៃប៉ុណ្ណោះ គឺចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភា។ បើហួសកាលកំណត់នេះ គណបក្សប្រឆាំង នឹងបាត់ឱកាសទាំងស្រុង ក្នុងការបោះឆ្នោតជាតិ នាថ្ងៃទី២៩ ខែកក្កដានោះ។ រហូតមកដល់ពេលនេះ ពេលវេលាកាន់តែខើចខ្លីណាស់ទៅហើយ សម្រាប់គណបក្សប្រឆាំង ក្នុងការចូលរួមការបោះឆ្នោត ឲ្យទាន់ពេលវេលា។

ដំណោះស្រាយនយោបាយ ក៏នៅតែមិនទាន់ចេញជារូបរាង។ មន្ត្រីគណបក្សសង្គ្រោះជាតិ ក៏នៅតែបន្តតស៊ូមតិលើឆាកអន្តរជាតិ ដើម្បីដាក់សម្ពាធលើរបបលោក ហ៊ុន សែន។ ក្នុងពេលជាមួយគ្នានេះ មន្ត្រីគណបក្សសង្គ្រោះជាតិ បានទាមទារឲ្យពន្យារពេលបោះឆ្នោត និងចុងក្រោយនេះ លោក សម រង្ស៊ី បានអំពាវនាវឲ្យពលរដ្ឋ កុំទៅចូលរួមបោះឆ្នោត និងស្នើឲ្យអ្នកសង្កេតការណ៍ជាតិ និង អន្តរជាតិ កុំចូលរួមក្នុងការបោះឆ្នោតខាងមុខឲ្យសោះ ប្រសិនបើគ្មានវត្តមានគណបក្សសង្គ្រោះជាតិ៕ ( វិទ្យុអាស៊ីសេរី, ចុចស្ដាប់សំឡើេង )