ក្រុមអ្នកទោសនយោបាយភាគច្រើនជា យុវជនកំពុងជាប់ឃុំឃាំង ក្នុងពន្ធនាគារព្រៃស អំពាវនាវដល់របបលោក ហ៊ុន សែន ដោះលែងពួកគេ ឲ្យមានសេរីភាពឡើងវិញដើម្បីមានឱកាសបានជួបជុំក្រុមគ្រួសារ និងស្វែងរកការសិក្សាបន្ត។
អ្នកទោសមនសិការចំនួន ១៤រូប ដែលកំពុងជាប់ឃុំឃាំងក្នុងពន្ធនាគារព្រៃស បានអំពាវនាវដល់គណបក្សប្រជាជនកម្ពុជា និងគណបក្សសង្គ្រោះជាតិ កុំយកពួកគេជាចំណាប់ខ្មាំងនៃនយោបាយ ហើយធ្វើយ៉ាងណា ប្រញាប់ស្វែងរកដំណោះស្រាយនយោបាយឲ្យបានឆាប់ ដើម្បីអាចឲ្យពួកគេមានសេរីភាពជួបជុំក្រុមគ្រួសារឡើងវិញ។
ការអំពាវនាវរបស់អ្នកទោសនយោបាយដែលរួមមានតំណាងរាស្ត្រ គណបក្សសង្គ្រោះជាតិ លោក អ៊ុំ សំអាន លោក អឿ ណារិទ្ធិ លោក អាន បឋម លោក អ៊ុក ពេជ្រសំណាង និងមនុស្ស១០នាក់ផ្សេងទៀត ធ្វើឡើងខណៈតំណាងរាស្ត្ររបស់គណបក្សសង្គ្រោះជាតិចំនួន បីនាក់ ត្រូវបានអនុញ្ញាតឲ្យចូលសួរសុខទុក្ខពួកគេ។
នៅថ្ងៃព្រហស្បតិ៍នេះ អគ្គនាយកដ្ឋានពន្ធនាគារនៃក្រសួងមហាផ្ទៃបានអនុញ្ញាតអោយតំណាងរាស្ត្ររបស់គណបក្សសង្គ្រោះជាតិចំនួន បីរូប រួមមានលោក អ៊ូ ច័ន្ទរ័ត្ន លោក កង គឹមហាក់ និងលោក ម៉ៅ មុនីវណ្ណ ចូលជួបសកម្មជននយោបាយដែលកំពុងជាប់ឃុំឃាំងទាំងនោះ ជាលើកដំបូង ក្រោយពីរដ្ឋាភិបាលបានបិទអស់រយៈពេល ១ឆ្នាំ មិនឲ្យពួកគេមានលទ្ធភាពចូលសួរសុខទុក្ខអ្នកទោសមនសិការ ទាំងអស់ក្នុងពន្ធនាគារព្រៃសនោះ។
តំណាងរាស្ត្ររបស់គណបក្សសង្គ្រោះជាតិ លោក អ៊ូ ច័ន្ទរ័ត្ន បានប្រាប់អាស៊ីសេរី តាមទូរស័ព្ទថា ក្រុមសកម្មជនរបស់បក្សប្រឆាំង ទាំងនោះកំពុងជួបការលំបាកក្នុងពន្ធនាគារយ៉ាងខ្លាំងដោយសារនៅទីនោះមានភាពចង្អៀតណែនតាន់តាប់ គ្មានកង្ហារ លំបាកដកដង្ហើម និងមិនត្រូវបានគេអនុញ្ញាតឲ្យជួបក្រុមគ្រួសាររបស់ពួកគេដែលមកសួរសុខទុក្ខនោះឡើយ។
លោកបន្តថា លោកមានក្ដីអាណិតអាសូរជាខ្លាំងចំពោះសកម្មជនទាំងនោះ ដែលភាគច្រើនជាយុវជនហើយត្រូវជាប់ពន្ធនាគារ នាំឲ្យខូចអនាគតដើម្បីអាចបន្តការសិក្សាបន្ថែម៖ «ពួកគាត់ហាក់ដូចជារង់ចាំដំណោះស្រាយហ្នឹងយូរហើយ និងរង់ចាំ ការលើកលែងទោសហ្នឹងយូរហើយ។ អ្នកខ្លះមានជាប់ពន្ធនាគារ រហូតដល់បីឆ្នាំជាងឯណោះទៅទៀត។ ពួកគាត់យល់ថាអាចមាន ដំណោះស្រាយនយោបាយណាមួយដែលធ្វើអោយពួកគាត់អាចរួចទោសអ៊ីចឹងទៅ។ ពួកគាត់ក៏បានអំពាវនាវដល់ព្រះមហាក្សត្រ និងប្រមុខរាជរដ្ឋាភិបាល គួរតែមានការសន្ដោសប្រោសប្រណីដល់ពួកគាត់ដែលភាគច្រើនជាយុវជន ព្រោះពួកគាត់បានជាប់ឃុំឃាំង នេះដោយអំពើអយុត្តិធម៌។ ពួកគាត់ក៏បាននិយាយដែរថាការប្រឈម មុខដាក់គ្នានូវពាក្យសម្ដីរវាងលោក សម រង្ស៊ី និងលោកនាយករដ្ឋមន្ត្រី កាន់តែធ្វើអោយពួកគាត់រងគ្រោះទៅវិញទេ ពីព្រោះវាគ្មានអ្វីត្រូវពាក់ព័ន្ធនឹងពួកគាត់នោះទេ។ ពួកគាត់អំពាវនាវថាគួរតែមានការពិចារណា ឲ្យពួកគាត់មានសេរីភាពដើម្បីកសាងអនាគតឡើងវិញ»។
លោកបន្តថា លោកបានជួបក្រុមសកម្មជន របស់គណបក្សប្រឆាំងទាំងអស់រួមទាំងលោកតំណាងរាស្ត្រ អ៊ុំ សំអាន ថែមទៀត ប៉ុន្តែក្រុមតំណាងរាស្ត្ររបស់លោកមិនបានជួបលោក មាជ សុវណ្ណារ៉ា នោះទេ ដោយសារលោក មាជ សុវណ្ណារ៉ា ត្រូវទទួលរងការចោទប្រកាន់លោក ហ៊ុន សែន ថា លោកបានលួចប្រើទូរស័ព្ទដៃក្នុងពន្ធនាគារ។ បច្ចុប្បន្ន ឆ្មាំគុកក៏បានដាក់ប្រព័ន្ធកាមេរ៉ាសុវត្ថិភាពដើម្បីតាមដានសកម្មភាពរបស់លោក មាជ សុវណ្ណារ៉ា។
កាលពីថ្ងៃទី២៧ ខែមិនា កន្លងទៅនេះលោក ហ៊ុន សែន បានប្រកាសជាសាធារណៈខឹងសម្បារយ៉ាងខ្លាំងទៅនឹងលោក មាជ សុវណ្ណារ៉ា ដែលលួចប្រើទូរស័ព្ទដៃក្នុងពន្ធនាគារនិយាយដើមលោក ហើយព្រមាន ថា លោក មាជ សុវណ្ណារ៉ា គ្មានថ្ងៃរួចខ្លួននោះទេ៖ «ហេតុអ្វីបានជាអោយ អា មាជ សុវណ្ណារ៉ា និយាយទូរស័ព្ទរាល់ថ្ងៃ។ តើប៉ូលិសយើងនៅអាគុកព្រៃសហ្នឹងវាយ៉ាងម៉េច? ប៉ូលិសធ្វើភ្លាម ហើយខ្លួនឯងហ្នឹង ហើយខ្លួនឯងហ្នឹងជាអ្នកបញ្ជូនអាព័ត៌មានហ្នឹងមកខ្ញុំ ហើយហេតុអីទុកអោយ អា មាជ សុវណ្ណារ៉ា នៅនិយាយទូរស័ព្ទ រាល់ថ្ងៃ? ទៅដក់ភ្លាមទៅ! ហើយអាហ្នឹងសុទ្ធតែថា លោក ហ៊ុន សែន ហ្នឹងតិចទៀតអញ្ចេះ តិចទៀតអញ្ចុះ។ ទៅៗដកពីអា មាជ សុវណ្ណារ៉ា! មួយម៉ោងទៀតដកចេញអោយបាន»។
លោក អ៊ូ ច័ន្ទរ័ត្ន អះអាងថា ចាប់តាំងពីការមានការដកទូរស័ព្ទ និងសម្ភារៈរបស់លោក មាជ សុវណ្ណារ៉ា ក្នុងពន្ធនាគារព្រៃសរួចមកមន្ត្រីពន្ធនាគារបានចាប់ផ្ដើមរឹតបន្តឹងដល់ក្រុមសកម្មជនផ្សេងទៀត ដូចជា ការផ្លាស់ប្ដូរបន្ទប់ ការដាក់កាមេរ៉ាសុវត្ថិភាព និងការហាមមិនឲ្យជួបក្រុមគ្រួសារដែលតែងមកសួរសុខទុក្ខពួកគេជាដើម៖ «មានមូសមានអីខាំអ៊ីចឹង ព្រោះនៅពន្ធនាគារមានមូសច្រើនណាស់ ហើយខ្ញុំបានឃើញជាក់ស្ដែងគឺគាត់បើដៃអាវអោយមើលឃើញកន្ទួលអ៊ីចឹងមែន។ ហើយម្យ៉ាងទៀតគេដាក់កាមេរ៉ានៅតាមបន្ទប់ហើយ តំណាងរាស្ត្រ អ៊ុំ សំអាន លោកថាធ្វើអោយមានការអៀនខ្មាសពេល ផ្លាស់ខោ ផ្លាស់អាវអី ហើយដាក់កាមេរ៉ាអញ្ចឹងធ្វើឲ្យប៉ះពាល់ដល់ ភាពឯកជនរបស់លោក។ មានការឆែកឆេរមែនក្រោយពីលោក ហ៊ុន សែន ប្រកាសអោយឆែកឆេររក ទូរស័ព្ទដៃពីលោក មាជ សុវណ្ណារ៉ា ហើយក៏មានការឆែកឆេរយកលុយ របស់លោក អ៊ុំ សំអាន ថែមទៀតតែគេអោយគាត់វិញហើយ»។
ក្រុមសកម្មជនបក្សប្រឆាំងទាំង១៤រូប ត្រូវបានចាប់ និងឃុំខ្លួន ដោយរបបក្រុងភ្នំពេញ អស់រយៈពេលជាង៣ឆ្នាំមកហើយ ពីបទប្រព្រឹត្តិ អំពើហិង្សាលើក្រុមសន្តិសុខខណ្ឌដូនពេញ នៅម្ដុំស្ពាននាគវត្តភ្នំ កាលពីពាក់កណ្ដាលខែកក្កដា ឆ្នាំ២០១៤។ ទោះជាយ៉ាងណាក្រុម អ្នកទោសមនសិការទាំងនោះ អះអាងថា ពួកគេគ្មានកំហុស ដូចការ ចោទប្រកាន់របស់តុលាការក្នុងរបបក្រុងភ្នំពេញឡើយ។
លោក អ៊ូ ចន្ទ័រ័ត្ន ឲ្យដឹងថាក្រុមសកម្មជនរបស់គណបក្សសង្គ្រោះជាតិទាំងនោះ អះអាងថាពួកគេបានទទួលទោសរយៈពេល២ភាគបី ក្នុងពន្ធនាគារហើយ ហើយរដ្ឋាភិបាលគួរពិចារណាដោះលែងពួកគេ ឲ្យមានសេរីភាពដូចដើមវិញ៕
 |
| លោក មាជ សុវណ្ណារ៉ា (រូបកណ្ដាល) មន្ត្រីទំនាក់ទំនងព័ត៌មាននៃគណបក្សសង្គ្រោះជាតិ ថ្លែងទៅកាន់អ្នកកាសែត នៅមុខសាលាដំបូងរាជធានីភ្នំពេញ នៅថ្ងៃទី២០ ខែកក្កដា ឆ្នាំ២០១៥ ។ RFA/Morm Moniroth |
ប្រភព៖ វិទ្យុអាស៊ីសេរី, ចុចស្ដាប់សំឡេង
0 ความคิดเห็น: