วันจันทร์ที่ 26 มีนาคม พ.ศ. 2561

ការិយាល័យឧត្ដមស្នងការអង្គការសហប្រជាជាតិប្រចាំនៅកម្ពុជា៖ កម្ពុជាត្រូវតែលុបចោលបទបរិហារកេរ្តិ៍ដើម្បីឲ្យស្របតាមមាត្រា១៩ នៃកតិកាសញ្ញាអន្តរជាតិ-Rights of expression

in សិទ្ធិមនុស្ស published on วันจันทร์, มีนาคม 26, 2561 leave a reply

ការិយាល័យឧត្ដមស្នងការអង្គការសហប្រជាជាតិប្រចាំនៅកម្ពុជា បានផ្ដល់អនុសាសន៍ឲ្យរបប លោក ហ៊ុន សែន គួរគិតគូរពិចារណា លុបចោលបទបរិហារកេរ្តិ៍ និងទោសបញ្ញត្តិផ្សេងៗទៀត នៃក្រមព្រហ្មទណ្ឌ ដើម្បីឲ្យស្របតាមមាត្រា១៩ នៃកតិកាសញ្ញាអន្តរជាតិស្ដីពី សិទ្ធិពលរដ្ឋ និងសិទ្ធិនយោបាយ។

អនុសាសន៍របស់ការិយាល័យឧត្ដមស្នងការអង្គការសហប្រជាជាតិប្រចាំនៅកម្ពុជា ធ្វើឡើងក្រោយពេលដែលស្ថាប័នអន្តរជាតិមួយនេះ សោកស្ដាយចំពោះប្រទេសថៃ ដែលបាននិរទេស ជនកំពុងទទួលបាន ឋានៈជាជនភៀសខ្លួនពីអង្គការសហប្រជាជាតិទទួលបន្ទុកជនភៀសខ្លួន ( UNHCR) ម្នាក់ គឺ អ្នកស្រី សំ សុខា។

អ្នកស្រី សំ សុខា គឺជាអ្នកគាំទ្រគណបក្សប្រឆាំង រស់នៅខេត្តកំពង់ស្ពឺ ត្រូវបានតុលាការក្នុងរបបក្រុងភ្នំពេញ ចេញដីកាឲ្យចាប់ខ្លួន ក្រោយពេលអ្នកស្រី បានយកស្បែកជើងគប់ទៅលើបដាឃោសនា របស់គណបក្សប្រជាជនកម្ពុជាមួយកន្លែង នៅភូមិអុង ឃុំរាម ស្រុកព្រៃនប់ ខេត្តព្រះសីហនុ កាលពីថ្ងៃទី១ ខែមេសា ឆ្នាំ២០១៧។

ក្នុងសេចក្ដីថ្លែងការណ៍ ចុះថ្ងៃទី២៣ ខែមីនា ក្នុងបណ្ដាញហ្វេសប៊ុក របស់ការិយាល័យឧត្ដមស្នងការអង្គការសហប្រជាជាតិប្រចាំនៅកម្ពុជា (United Nation Human Right In Cambodia) បានលើកឡើងថា ប្រព័ន្ធសិទ្ធិមនុស្សរបស់អង្គការសហប្រជាជាតិឲ្យតម្លៃខ្ពស់ ជាពិសេសលើការបញ្ចេញមតិ ដោយសេរីមិនមានការហាមប្រាម ទាក់ទងទៅនឹងបុគ្គលសាធារណៈ ក្នុងវិស័យសាធារណៈ និងក្នុងស្ថាប័នសាធារណៈ។

មន្ត្រីអង្កេតជាន់ខ្ពស់សមាគមសិទ្ធិមនុស្សលីកាដូ (Licadho) លោក អំ សំអាត សង្កេតឃើញថា បទចោទបរិហារកេរ្តិ៍ ក្នុងច្បាប់ព្រហ្មទណ្ឌ មិនមែនជា ឧបសគ្គធំ ដែលគួរឲ្យព្រួយបារម្ភទេ។ ប៉ុន្តែ បទចោទនេះ លាយឡំជាមួយបទចោទញុះញង់ ទើបបណ្ដាលឲ្យសកម្មជនបរិស្ថាន សកម្មជន សិទ្ធិមនុស្ស ដីធ្លី និងសកម្មជនគណបក្សនយោបាយ បានក្លាយជាជនរងគ្រោះ។

តុលាការខេត្តកំពង់ស្ពឺ សម្រេចតម្កល់សាលក្រមកាត់ទោសដោយកំបាំងមុខ ឲ្យអ្នកស្រី សំ សុខា ជាប់ពន្ធនាគាររយៈពេលពីរឆ្នាំ។ អ្នកស្រី សំ សុខា ត្រូវបានសមត្ថកិច្ចថៃ ចាប់បញ្ជូនឲ្យរបបក្រុង ភ្នំពេញវិញ កាលពីកំឡុងខែកុម្ភៈ ក្រោយពេលអ្នកស្រី បានរត់ចេញពីការតាមចាប់ខ្លួនរបស់សមត្ថកិច្ចកម្ពុជាជិតមួយឆ្នាំ។

មេធាវីម្នាក់ដែលថ្លែងក្នុងលក្ខខណ្ឌមិនឲ្យបញ្ចេញឈ្មោះ បកស្រាយថា បទបរិហារកេរ្តិ៍ បើទោះជាស្ថិតក្នុងប្រភេទបទព្រហ្មទណ្ឌក៏ដោយ ប៉ុន្តែត្រូវបានវិសោធនកម្ម មកត្រឹមការផាកពិន័យជាប្រាក់ ដូច្នេះបទបរិហារកេរ្តិ៍ មិនមានស្ថានទម្ងន់ទោសដែលអាចឲ្យប្រទេសមួយធ្វើបត្យាប័ន ឬចាប់បញ្ជូនមនុស្សមកវិញនោះទេ។ ប៉ុន្តែ លោកមេធាវីប្រាប់ថា ស្ថានភាពជាក់ស្ដែងកន្លងមក ការបកស្រាយបទចោទនេះ បានខុសពីអត្ថន័យច្បាប់។

អាស៊ីសេរី នៅមិនទាន់អាចសុំប្រតិកម្មពីមន្ត្រីជាន់ខ្ពស់ នៃរបបក្រុង ភ្នំពេញបានទេពាក់ព័ន្ធនឹងការផ្ដល់អនុសាសន៍របស់ភ្នាក់ងារអង្គការសហប្រជាជាតិឲ្យមានការលុបចោលបទបរិហារកេរ្តិ៍ទៅលើករណី អ្នកស្រី សំ សុខា នោះ៕