អ្នកជំនាញខាងអភិរក្ស សិល្បៈ វប្បធម៌ខ្មែរ បារម្ភពីការផលិតបទចម្រៀងញាក់កន្ត្រាក់អារម្មណ៍ ដែលគេនិយមហៅថា ចង្វាក់បែកស្លុយនោះ កើនឡើងក្នុងឱកាសបុណ្យចូលឆ្នាំថ្មីប្រពៃណីជាតិ ប៉ុន្តែការលេងល្បែងរបាំប្រពៃណី និងការផលិតបទចម្រៀងបែបប្រជាប្រិយ ត្រូវបានគេសង្កេតឃើញថា មានការធ្លាក់ចុះ និងមិនសូវជាទីចាប់អារម្មរណ៍របស់មនុស្សសម័យថ្មីមួយចំនួនឡើយ។ អ្នកជំនាញយល់ថាបញ្ហានេះ អាចធ្វើឲ្យប៉ះពាល់ដល់អត្តសញ្ញាណប្រពៃណី ទំនៀមទម្លាប់ នៃពិធីបុណ្យចូលឆ្នាំខ្មែរ និងវប្បធម៌ខ្មែរ រួមទាំងអាចធ្វើឲ្យយុវជនស្រករក្រោយ បាត់បង់នៅមនសិការចំពោះជាតិខ្លួនជាដើម។
នៅប៉ុន្មានឆ្នាំចុងក្រោយនេះ ល្បែងចោលឈូង បោះអង្គុញ លាក់កន្សែង វាយក្អម និងល្បែងជាច្រើនប្រភេទទៀត អមដោយបទចម្រៀងប្រជាប្រិយផ្តោះផ្តងក្នុងសម្លៀកបំពាក់ប្រពៃណីជាតិ ដែលជាអត្តសញ្ញាណនៃពិធីបុណ្យចូលឆ្នាំខ្មែរ ហាក់ដូចជាកាន់តែរសាត់ឆ្ងាយបន្តិចម្តងៗ ពីក្រសែភ្នែកនិងអារម្មណ៍របស់យុវវ័យសម័យថ្មី។
ទាក់ទងបញ្ហានេះ ប្រជាពលរដ្ឋរស់នៅខេត្តស្វាយរៀង ឈ្មោះ ស៊ុន មករា លើកឡើងថា ពិធីបុណ្យចូលឆ្នាំ «ច» ២០១៨ នេះ ហាក់ដូចជាសោះកក្រោះសម្រាប់លោក ព្រោះលោកឃើញថា ទីណាក៏ដោយ ក៏ឮតែបទចម្រៀងបែកស្លុយ ខុសឆ្ងាយពីបណ្តាឆ្នាំមុនៗ។
លោក ស៊ុន មករា បន្តថា នៅប៉ុន្មានឆ្នាំមុន ប្រជាពលរដ្ឋខ្មែរ តែងតែមានអារម្មណ៍រំភើប សប្បាយរីករាយ នៅពេលឮបទចម្រៀងប្រជាប្រិយ ដូចជារាំវង់ សារ៉ាវ៉ាន់ តាលុង និងចង្វាក់កន្ទ្រឹម ជាដើម ដែលត្រូវបានគេចាក់តាមធុងប៉ាស់នៅតាមវត្ត ឬភូមិ និងស្រុកនានា សម្រាប់អប់អរពិធីបុណ្យ ចូលឆ្នាំខ្មែរម្តងៗ។
ពលរដ្ឋដទៃទៀត ក៏រិះគន់ដែរថា របបលោក ហ៊ុន សែន សព្វថ្ងៃមិនសូវចាប់អារម្មណ៍ក្នុងការលើកស្ទួយវិស័យសិល្បៈ ដែលជាខឿនវប្បធម៌ជាតិប៉ុន្មាននោះទេ។ ម្យ៉ាងទៀត ការដែលផលិតកម្មធំៗ នាំគ្នាប្រកួតប្រជែងផលិតបទចម្រៀងបែកស្លុយ ក្នុងឱកាសបុណ្យចូលឆ្នាំនេះ ក៏ព្រោះតែពួកគេ ធ្លាប់ទទួលបានការគាំទ្រ និងលើកទឹកចិត្តពីរបបលោក ហ៊ុន សែន។ ក្នុងពិធីបុណ្យចូលឆ្នាំ កាលពីឆ្នាំ២០១៧ លោក ហ៊ុន សែន និងភរិយារបស់លោក បានយកបទរាំញីកែងជើង បទរាំអញ្ចេកៗ និងបទឆ្កែរត់បុកប៉ោត ដើររាំគ្រប់ទីកន្លែង សូម្បីតែនៅក្នុងពិធីអង្គរសង្ក្រាន្តនៅខេត្តសៀមរាបក្តី។ រីឯលោក ហ៊ុន ម៉ាណែត កូនប្រុសច្បងលោក ហ៊ុន សែន បានយកបទរាំញីកែងជើងទៅរាំនៅប្រទេសកាណាដាដែរ ខណៈដែលគណៈប្រតិភូក្រសួងការពារជាតិដឹកនាំដោយលោក ទៀ បាញ់ បាននាំគ្នារាំបទញីកែងជើងនៅប្រទេសរុស្សី។
តារាចម្រៀង អ្នកនាង ខាត់ សុឃីម មានប្រសាសន៍ថា ការផលិតបទចម្រៀងបែបកន្ទ្រឹម និងបែបប្រជាប្រិយ គឺមានចំនួនតិចតូចបំផុត បើប្រៀបធៀបជាមួយបទញាក់នៅក្នុងពិធីបុណ្យចូលឆ្នាំនេះ។ អ្នកនាងសម្តែងការសោកស្តាយ និងព្រួយបារម្ភយ៉ាងខ្លាំងចំពោះវប្បធម៌ប្រពៃណីខ្មែរកំពុងបាត់បង់បន្តិចម្តងៗ។ តាមចម្រៀងពហុជំនាញរូបនេះបន្តទៀតថា សព្វថ្ងៃប្រជាពលរដ្ឋខ្មែរភាគច្រើន នៅតែគាំទ្របទចម្រៀងបែបប្រជាប្រិយខ្មែរដដែល ប៉ុន្តែដោយសារខាងផលិតកម្ម និងអ្នកចម្រៀង ចេះតែនាំគ្នាផលិត និងច្រៀងបទញាក់ៗ ទៅវិញ។
នៅក្នុងពិធីបុណ្យចូលឆ្នាំនេះ អ្នកនាង ខាត់ សុឃីម បានផលិតបទចម្រៀងបែបប្រជាប្រិយចំនួន ៧បទ។ ក្នុងចំណោមនោះ មានបទមួយមានចំណងជើងថា «ពុកវាមើលកូន អូនឡើងរាំ'» បានទទួលការពេញនិយមយ៉ាងខ្លាំងពីពលរដ្ឋខ្មែរ។
កាលពីមុនពិធីបុណ្យចូលឆ្នាំខ្មែរ អ្នកនាង ខាត់ សុឃីម ក៏បានចេញបទចម្រៀងមួយបទទៀតដែរ ដែលជាភ្លេង បុរាណមានចំណងជើងថា «រងា»។
បទមួយនេះបង្ហាញអំពីការស្តាយស្រណោះ នូវបទភ្លេងបុរាណខ្មែរ ដែល ត្រូវបានគេទុកចោល មិនសូវមានការគាំទ្រដូចបទបរទេស ជាពិសេស គឺក្មេងសម័យថ្មីតែម្ដង ដែលចូលចិត្តច្រៀងតែបទបែកស្លុយ។
អ្នកនាង ខាត់ សុឃីម ឲ្យដឹងដែរថា អ្នកនាងនឹងខិតខំបន្តធ្វើបទចម្រៀងបែបប្រពៃណី ជាមួយនឹងការតុបតែងខ្លួនក្នុងឈុតហូល ផាមួង ដើម្បីលើកស្ទួយវប្បធម៌ខ្មែរ និងនាំអារម្មរណ៍ប្រជាពលរដ្ឋឲ្យសប្បាយរីករាយក្នុងពិធីបុណ្យចូលឆ្នាំជាតិ។
បទចម្រៀងចង្វាក់ញាក់ៗ ដែលលេចធ្លោ មានទាំងការគាំទ្រ និងមានការរិះគន់ក៏ខ្លាំងដែរនោះ មានដូចជាបទ«បីឆ្កែចូលរាំ បទដឹកឆ្កែទៅលេងស្រុក បទមាន់ស្រែ បទស្រលាញ់អូនស្លៀកខោរហែក បទហាមលេងជេម៉ែ មាន់ស្រែ បន្លែស្រស និងបទរាំស្កុប ជាដើម…។
បទទាំងនេះ ត្រូវបានក្រសួងព័ត៌មានហាមមិនឲ្យចាក់ផ្សាយតាមរលកធាតុអាកាសវិទ្យុ និង ទូរទស្សន៍ឡើយ។
អ្នកនាំពាក្យក្រសួងវប្បធម៌ និងវិចិត្រសិល្បៈ លោក ថៃ នរៈសត្យា មានប្រសាសន៍ថា បទចម្រៀង ដែលបណ្តាផលិតកម្មបានតាក់តែង និងផលិតនោះ គឺជាការឆ្នៃប្រឌិត និងជាការតម្រូវទៅលើទីផ្សារ ហើយគ្មានចេតនាជាន់ឈ្លីវប្បធម៌ និងចង់ឲ្យគេស្អប់ ឬរិះគន់នោះទេ។ លោកបន្ថែមថា ផលិតកម្មទាំងអស់ ក៏មិនបានផលិតសុទ្ធតែបទបែកស្លុយនោះដែរ ពោលគឺមានទាំងបទរាំវង់ រាំក្បាច់ និងចង្វាក់កន្ទ្រឹមទៀតផង។ ទន្ទឹមគ្នានេះ លោកប្រតិកម្មថា អ្នករិះគន់បទចម្រៀងញាក់មួយចំនួន ចេះតែរិះគន់តាមគ្នាប៉ុណ្ណោះ មិនបានយល់ដឹងស៊ីជម្រៅលើអត្ថន័យនៃបទចម្រៀងនោះឡើយ។
ផ្ទុយពីការលើកឡើងនេះ ព្រះចៅអធិការវត្តប្រាសាទស្រះកណ្តាល ហៅវត្តខ្ចាស់ ខេត្តបន្ទាយមាន ជ័យ ព្រះតេជព្រះគុណ ចាន់ សុជន មានថេរៈដីកាថា ការផលិតបទចម្រៀង ដែលគ្រាន់តែតម្រូវទៅលើទីផ្សារនោះ មិនគួរភ្លេចខ្លួនធ្វើឲ្យប៉ះពាល់ដល់តម្លៃវប្បធម៌ជាតិនោះទេ។ ព្រះតេជគុណបន្តថា ជាការពិតណាស់ វប្បធម៌ ប្រពៃណី និងទំនៀមទម្លាប់ គឺជាអត្តសញ្ញាណរបស់ជាតិសាសន៍នីមួយៗ។ សម្រាប់ជាតិសាសន៍ខ្មែរ ល្បែង របាំប្រជាប្រិយ បទចម្រៀង និងសម្លៀកបំពាក់ប្រពៃណីសម្រាប់បុណ្យចូលឆ្នាំថ្មី គឺជាសម្បត្តិវប្បធម៌ដ៏មានតម្លៃ ដែលដូនតាខ្មែរបានបន្សល់ទុកឲ្យកូនចៅជំនាន់ក្រោយ។ សម្បត្តិវប្បធម៌ទាំងនោះ គួរតែត្រូវបានអភិរក្សឲ្យបានគង់វង្ស បើទោះជាមនុស្សចាំបាច់ត្រូវការភាពទំនើបក៏ដោយ។
លើសពីនេះទៀត ព្រះតេជគុណ ចាន់ សុជន ផ្តល់មតិថា អ្នកដឹកនាំប្រទេស ឬស្ថាប័នពាក់ព័ន្ធ គួរតែយកមតិរិះគន់របស់មហាជនមកពិនិត្យមើល ហើយកែតម្រូវឡើងវិញ ដើម្បីជៀសវាងផលវិបាកនានា ដែលអាចកើតឡើងនាពេលអនាគត។
អ្នកនាង ខាត់ សុឃីម អំពាវនាវឲ្យយុវជនខ្មែរជំនាន់ក្រោយភ្ញាក់ស្មារតីស្គាល់តម្លៃសម្បត្តិវប្បធម៌ជាតិ ហើយចេះស្រឡាញ់ និងថែរក្សាកេរ្តិ៍ដំណែលដូនតារបស់ខ្លួន ព្រោះប្រជាពលរដ្ឋខ្មែរស្ទើរតែគ្រប់គ្នា តែងតែទន្ទេញរត់មាត់ថា វប្បធម៌រលត់ជាតិរលាយ វប្បធម៌ពណ្ណារាយជាតិថ្កើងថ្កាន៕
បាទ! លោកអ្នកនាងជាទីមេត្រី! ខ្ញុំបាទសូមប្រសិទ្ធិពរជ័យ ជូនលោកអ្នកនាង ព្រមទាំងប្រជាជាតិខ្មែរទាំងមូល សូមឲ្យឆ្នាំថ្មីនេះពាំនាំមកជូនលោកអ្នកនូវសុខសន្តិភាព សុភមង្គល សុខភាពល្អ និងភាពរុងរឿងតរៀងទៅ! ៕
ប្រភព៖
វិទ្យុអាស៊ីសេរី
