ស្ថាប័នសមាគមនិងសង្គមស៊ីវិលចំនួន១២ ស្ថាប័ន ថាការរំលាយគណបក្សសង្គ្រោះជាតិ (CNRP) គឺមិនគោរពម្ចាស់សំឡេងឆន្ទៈរបស់ប្រជាពលរដ្ឋខ្មែរប្រមាណ ៣លាននាក់!
សេចក្តីថ្លែងការណ៍ដែលវិទ្យុវាយោទទួលបាននៅរសៀលថ្ងៃទី១៣ ខែវិច្ឆិកានេះ បញ្ជាក់ថា ស្ថាប័នសមាគមនិងសង្គមស៊ីវិលចំនួន១២នោះ សម្តែងការព្រួយបារម្ភខ្លាំងចំពោះបណ្តឹងរំលាយគណបក្សសង្គ្រោះជាតិ ដែលជាគណបក្សប្រកួតប្រជែងដ៏ធំមួយនៅកម្ពុជា ។ ការរំលាយគណបក្សប្រឆាំងរហូតមិនអាចចូលរួមប្រកួតប្រជែងបោះឆ្នោតនៅឆ្នាំក្រោយនេះ នឹងបង្កទៅជាបញ្ហានៃភាពត្រឹមត្រូវតាមច្បាប់ជាតិ អន្តរជាតិ និងយុត្តិធម៌ ក្នុងការបោះឆ្នោតនៅឆ្នាំ២០១៨ខាងមុខនេះ ហើយក៏នឹងនាំឱ្យធ្លាក់ចុះខ្លាំងនៃដំណើរការប្រជាធិបតេយ្យជាមួយគុណភាពពហុបក្សនៅកម្ពុជា ។
មន្ត្រីផ្នែកច្បាប់ និងអង្កេតនៃអង្គការខុមហ្វ្រែល លោក យឿង សុធារ៉ា បានថ្លែងប្រាប់វិទ្យុវាយោកាលពីរសៀលថ្ងៃទី១១ ខែវិច្ឆិកា ថា កាលណាពុំមានការចូលរួមប្រកួតប្រជែងពីសំណាក់គណបក្សប្រឆាំង នោះនឹងអាចធ្វើឱ្យប៉ះពាល់ដល់កិត្យានុភាពនៃការរៀបចំបោះឆ្នោតនៅកម្ពុជា និងប៉ះពាល់ដល់ការទទួលស្គាល់ពីសហគមន៍អន្តរជាតិ។
យ៉ាងណាម៉ិញ សេចក្តីថ្លែងការណ៍ដដែលក៏បានបញ្ចាក់ផងដែរថា ការអនុវត្តរូបមន្តថ្មីនៃការធ្វើវិសោធនកម្មច្បាប់ ដើម្បីបែងចែកអាសនៈ នឹងធ្វើឱ្យប៉ះពាល់ជាអវិជ្ជមាន និងអយុត្តិធម៌ធ្ងន់ធ្ងរចំពោះសំឡេងម្ចាស់ឆ្នោត ។ ម្យ៉ាងទៀត បើក្នុងករណីរំលាយ និងបែងចែកអាសនៈរបស់គណបក្សសង្គ្រោះជាតិ គឺជាការមិនគោរពម្ចាស់សំឡេងឆន្ទៈរបស់ប្រជាពលរដ្ឋខ្មែរប្រមាណ ៣លាននាក់ដែលបានបោះឆ្នោតគាំទ្រគណបក្សនេះ ។
គូសបញ្ជាក់ផងដែរថា បណ្តឹងរំលាយគណបក្សសង្គ្រោះជាតិត្រូវបានធ្វើឡើងកាលថ្ងៃទី០៦ ខែតុលា ដោយក្រុមមេធាវី៥រូប របស់ក្រសួងមហាផ្ទៃ ដោយយោងតាមពាក្យបណ្តឹងរបស់គណបក្សហ្វ៊ុនស៊ិនប៉ិចរបស់សម្តេចក្រុមព្រះ និងគណបក្សយុវជនកម្ពុជារបស់លោក ពេជ្រ ស្រស់ ពីបទឃុបឃិតនឹងបរទេសដើម្បីរំលាយរដ្ឋាភិបាលកម្ពុជា ។ តុលាការកំពូលនឹងបើកសវនាការលើបណ្តឹងរំលាយគណបក្សសង្គ្រោះជាតិ នៅថ្ងៃទី១៦ ខែវិច្ឆិកាខាងមុខនេះ ៕ ((ប្រភព ៖ វាយោ))
0 ความคิดเห็น: