សមាជិកព្រឹទ្ធសភាអាមេរិក មកពីគណបក្សសាធារណៈ លោក ថេត គ្រូស (Ted Cruz) បានបញ្ចេញប្រតិកម្មទៅលើចំណាត់ការរបស់តុលាការកំពូល ដែលសម្រេចបន្តឃុំខ្លួនលោក កឹម សុខា។
លោក ថេត គ្រូស បានហៅការសម្រេចរបស់តុលាការកំពូលនេះថា ជាការសម្រេចដ៏អាក្រក់ជាទីបំផុត។ លោកព្រមានជាថ្មីថា បើសិនជារដ្ឋាភិបាលមិនដោះលែងលោក កឹម សុខា ឲ្យបានមុនថ្ងៃទី៩ ខែ វិច្ឆិកា ទេ លោកនឹងធ្វើយុទ្ធនាការដើម្បីឲ្យរដ្ឋាភិបាលសហរដ្ឋអាមេរិក ដាក់ទណ្ឌកម្មលើមន្ត្រីរដ្ឋាភិបាលកម្ពុជា មិនឲ្យចូលទឹកដីអាមេរិក ទៀតទេ។
ទន្ទឹមនឹងនេះ ក្រុមមេធាវីរបស់លោក កឹម សុខា ថានឹងដាក់ពាក្យប្ដឹងសុំឲ្យលោក កឹម សុខា នៅក្រៅឃុំជាបណ្ដោះអាសន្នក្នុងពេលឆាប់ៗនេះ។
លោកមេធាវី ហែម សុជាតិ ក្នុងចំណោមមេធាវីរបស់លោក កឹម សុខា ទាំង ៧រូប ឲ្យដឹងនៅក្រោយពេលតុលាការកំពូលសម្រេចបន្តឃុំខ្លួនលោក កឹម សុខា កាលពីព្រឹកថ្ងៃទី៣១ ខែតុលា ថា ទោះបីជាតុលាការកំពូល និងសាលាឧទ្ធរណ៍សម្រេចឲ្យក្រុមមេធាវីរបស់លោកចាញ់ក្ដីលើសំណុំរឿងប្ដឹងសាទុក្ខប្រឆាំងនឹងការឃុំខ្លួនលោក កឹម សុខា ក្ដី ប៉ុន្តែក្រុមមេធាវីនឹងប្រើមធ្យោបាយផ្សេងទៀត គឺប្ដឹងសុំនៅក្រៅឃុំជាបណ្ដោះអាសន្ន៖ «»។
តុលាការកំពូលបានបើកសវនាការជំនុំជម្រះក្ដីប្រមាណជា ៣ម៉ោង លើបណ្ដឹងសាទុក្ខប្រឆាំងនឹងការឃុំខ្លួនលោក កឹម សុខា កាលពីព្រឹកថ្ងៃទី៣១ ខែតុលា។ នៅទីបំផុតប្រធានជំនុំជមជម្រះ លោក ឃឹម ប៉ុណ្ណ បានសម្រេចយកការសម្រេចរបស់សាលាដំបូង និងសាលាឧទ្ធរណ៍ ថាជាបានការ និងលើកពីហេតុផលថា គិតពីសុវត្ថិភាពរបស់លោក កឹម សុខា ដោយមិនខ្វល់អំពីការពន្យល់ និងយោងលើច្បាប់ពាក់ព័ន្ធមួយចំនួនទៀត ដែលក្រុមមេធាវីព្យាយាមពន្យល់នៅក្នុងសវនាការនោះឡើយ។
តំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន ដែលត្រូវបានអាជ្ញាធររារាំងមិនឲ្យចូលស្ដាប់សវនាការនេះ លើកឡើងថា លោកមិនរំពឹងថា ក្រុមមេធាវីរបស់លោក កឹម សុខា ឈ្នះក្ដីនោះឡើយ។ លោកអះអាងថា មន្ត្រីតុលាការមួយចំនួនជាសមាជិករបស់គណបក្សប្រជាជនកម្ពុជា ដូច្នេះការជំនុំជម្រះក្ដី គឺផ្អែកលើស្ថានភាពនយោបាយ។ លោក អ៊ូ ច័ន្ទរ័ត្ន អំពាវនាវថា មានតែការដោះស្រាយតាមផ្លូវនយោបាយទេ ទើបអាចឲ្យលោក កឹម សុខា មានសេរីភាពវិញបាន។
ព្រឹទ្ធសមាជិកសហរដ្ឋអាមេរិក លោក ថេត គ្រូស ធ្លាប់បានដាក់សារលិខិតមួយច្បាប់ផ្ញើជូនទៅអគ្គរាជទូតខ្មែរប្រចាំសហរដ្ឋអាមេរិក លោក ជុំ ប៊ុនរ៉ុង។ នៅក្នុងសារលិខិតចុះថ្ងៃទី២៣ ខែតុលា លោក ថេត គ្រូស ទុកពេលឲ្យរដ្ឋាភិបាល លោក ហ៊ុន សែន រហូតដល់ត្រឹមថ្ងៃទី៩ ខែវិច្ឆិកា ដើម្បីដោះលែងលោក កឹម សុខា។ លោក ថេត គ្រូស ដែលមានដើមកំណើតកាណាដា ព្រមានបន្ថែមថា ទំនាក់ទំនងរបស់សហរដ្ឋអាមេរិក និងកម្ពុជា កន្លងមក ប្រព្រឹត្តទៅបានក៏ដោយសារឈរលើស្មារតីនៃលទ្ធិប្រជាធិបតេយ្យ សេរី និងការបោះឆ្នោតដែលគួរឲ្យជឿទុកចិត្តមួយបាន។ ប៉ុន្តែការណ៍ដែលរដ្ឋាភិបាលកម្ពុជា បិទក្រុមឯករាជ្យ ដែលឃ្លាំមើលស្ថានការណ៍បោះឆ្នោត បិទអង្គការសិទ្ធិមនុស្ស បិទស្ថានីយវិទ្យុជាច្រើន និងចាប់លោក កឹម សុខា ដាក់ពន្ធនាគារដូច្នេះ លោកនាយករដ្ឋមន្ត្រី ហ៊ុន សែន មិនត្រឹមតែកំពុងតែបំផ្លាញទំនងរវាងសហរដ្ឋអាមេរិក និងកម្ពុជា ប៉ុណ្ណោះទេ ប៉ុន្តែ លោក ហ៊ុន សែន កំពុងតែបំផ្លាញលទ្ធិប្រជាធិបតេយ្យនៅកម្ពុជា ផងដែរ៕
ប្រភព ៖ វិទ្យុអាស៊ីសេរី
0 ความคิดเห็น: