ប្រធានចលនាសង្គ្រោះជាតិ លោក សម រង្ស៊ី ប្រកាសឲ្យពលរដ្ឋឈប់ទិញទឹកសុទ្ធវីតាល់និងទំនិញផ្សេងៗទៀត!!
ខណៈដែលរបបក្រុងភ្នំពេញ កំពុងរិះរកវិធីប្ដឹង និងស្វះស្វែងបង្ក្រាបចលនាសង្គ្រោះជាតិ ដែលទើបបង្កើតឡើងដោយ លោក សម រង្ស៊ី ចលនានេះក៏ចាប់ផ្ដើមយុទ្ធនាការឃោសនាជាលើកទីមួយរបស់ខ្លួនដែរ នោះគឺការអំពាវនាវអោយប្រជាពលរដ្ឋធ្វើពហិការឈប់ទិញទឹកសុទ្ធម៉ាក វីតាល់ (Vital) និងមុខទំនិញមួយចំនួនផ្សេងៗទៀតប្រើប្រាស់ ចាប់ពីសប្ដាហ៍ក្រោយនេះទៅ។
ចលនាសង្គ្រោះជាតិ បានចាត់ទុកទឹកសុទ្ធវីតាល់ និងផលិតផលជាច្រើនទៀតដែលជាក្រុមហ៊ុនរបស់ក្រុមគ្រួសារលោកនាយករដ្ឋមន្ត្រី និងបក្ខពួក ជាក្រុមដែលបំផ្លាញលទ្ធិប្រធិបតេយ្យនៅកម្ពុជា ហើយថា ទឹកសុទ្ធវីតាល់ នេះ ជាទឹកជ្រោះទឹកភ្នែក។
នៅក្នុងខ្សែវីដេអូមួយដែលរៀបរាប់ពីបុរសវ័យចំណាស់ម្នាក់រងគ្រោះនៅតំបន់បឹងកក់ តាមរយៈបទចំរៀងនោះ មានខ្លឹមសារថា ក្រុមហ៊ុនវីតាល់ ជាក្រុមហ៊ុនដែលកើតចេញពីត្រកូលអ្នកមានអំណាចផ្ដាច់ការ ដែលបំផ្លាញលទ្ធិប្រជាធិបតេយ្យ ជាក្រុមហ៊ុនដែលបានច្រោះបឺតទឹកភ្នែកបងប្អូនបឹងកក់ និងឈូសឆាយបំផ្លាញផ្ទះបងប្អូនបឹងកក់ ជាដើម។
អនុប្រធានគណបក្សសង្គ្រោះជាតិ លោក អេង ឆៃអ៊ាង ដែលជាសមាជិកចលនាសង្គ្រោះជាតិ ឲ្យដឹងថា ក្រុមហ៊ុនដែលធ្វើបាបប្រជាពលរដ្ឋ ហើយម្ចាស់ក្រុមហ៊ុនដែលចូលរួមបំផ្លាញលទ្ធិប្រជាធិបតេយ្យនោះ មិនមែនមានតែក្រុមហ៊ុនវីតាល់នេះមួយទេ គឺនៅមានក្រុមហ៊ុនជាច្រើនទៀត ដែលខាងចលនាសង្គ្រោះជាតិ នឹងអំពាវនាវឲ្យពលរដ្ឋឈប់ប្រើប្រាស់ផលិតទាំងនោះនៅសប្ដាហ៍ក្រោយ។
ទាក់ទងនឹងបញ្ហានេះដែរ សារព័ត៌មានដែលជាឧបករណ៍ឃោសនារបស់លោក ហ៊ុន សែន បានចុះផ្សាយនៅថ្ងៃទី១៦ ខែកុម្ភៈ ថា សាលាដំបូងរាជធានីភ្នំពេញ កំពុងបន្តនីតិវិធីបណ្ដឹងរបស់ក្រសួងមហាផ្ទៃ ដែលប្ដឹងមន្ត្រីគណបក្សសង្គ្រោះជាតិ និងសមាជិកចលនាសង្គ្រោះជាតិ មួយចំនួនពីបទក្បត់ជាតិ ក្នុងនោះមានលោក សម រង្ស៊ី ជាប្រធាន លោក សុខា លី ជាអនុប្រធាន លោក រី គា ជាអគ្គលេខាធិការ លោក អូន ឈឹម លោក សៀ ភារម្យ លោក សូរី ប៉ុន និងមន្ត្រីតំណាងរាស្ត្រជាប់ឆ្នោតគណបក្សសង្គ្រោះជាតិ មួយចំនួនរួមមាន អ្នកស្រី ជូឡុង សូមូរ៉ា លោក ហូរ វ៉ាន់ លោក តុប វ៉ាន់ចាន់ និងលោក នុត រំដួល។
ឆ្លើយតបនឹងការប្ដឹងផ្ដល់នេះ អនុប្រធានគណបក្សសង្គ្រោះជាតិ លោក អេង ឆៃអ៊ាង ឲ្យដឹងកាលពីថ្ងៃទី១៥ ខែកុម្ភៈ ថា លោកមិនចាប់អារម្មណ៍នឹងបណ្ដឹងរបស់ក្រសួងមហាផ្ទៃ នេះទេ។ ផ្ទុយទៅវិញ លោក អេង ឆៃអ៊ាង អះអាងថា របបរបស់លោក ហ៊ុន សែន កំពុងតែភ័យព្រួយ និងខ្លាចស្រមោលខ្លួនឯង ដែលធ្វើទុក្ខបុកម្នេញប្រជាពលរដ្ឋនូវទង្វើអាក្រក់ ដែលបំផ្លាញនីតិរដ្ឋ សិទ្ធិមនុស្ស និងលទ្ធិប្រជាធិបតេយ្យជាដើម៕
ប្រភព៖ វិទ្យុអាស៊ីសេរី
0 ความคิดเห็น: