ក្រុមសមាជិកសភាអាស៊ានដើម្បីសិទ្ធិមនុស្ស (APHR)ថាការបោះឆ្នោតព្រឹទ្ធសភានឹងគ្មានភាពស្របច្បាប់!
ក្រុមសមាជិកសភាអាស៊ានដើម្បីសិទ្ធិមនុស្ស (APHR) នៅថ្ងៃសុក្រ ទី២៣ កុម្ភៈ នេះ អះអាងថា ការបោះឆ្នោតព្រឹទ្ធសភានេះ នឹងមិនអាចចាត់ទុកថាមានភាពស្របច្បាប់តាមលក្ខណៈប្រជាធិបតេយ្យបាននោះឡើយ។ អង្គការនេះសង្កត់ធ្ងន់ៗថា នេះគឺដោយសារតែការរម្លាយគណបក្សប្រឆាំងធំជាងគេ គឺគណបក្សសង្គ្រោះជាតិ និងការរឹតត្បិតសិទ្ធិសេរីភាពជារួមក្នុងប្រទេសកម្ពុជា ជាបន្តបន្ទាប់ នៅរយៈពេលប៉ុន្មានឆ្នាំចុងក្រោយនេះ។ របបក្រុងភ្នំពេញ នឹងរៀបចំឲ្យមាននូវការបោះឆ្នោតព្រឹទ្ធសភានៅថ្ងៃអាទិត្យ ទី២៥ កុម្ភៈ នេះ ដោយគ្មានការចូលរួមពីគណបក្សសង្គ្រោះជាតិ។
ប្រធានក្រុមសមាជិកសភាអាស៊ាន ដើម្បីសិទ្ធិមនុស្ស លោក ឆាលស៍ សានទីអេហ្គោ (Charles Santiago) ថ្លែងនៅក្នុងសេចក្ដីប្រកាសព័ត៌មានថា ការបោះឆ្នោតព្រឹទ្ធសភានេះ គឺជារឿងរ៉ាវដ៏គួរឲ្យអាម៉ាស់មួយសម្រាប់ប្រទេសកម្ពុជា។ លោកថា លោកនាយករដ្ឋមន្ត្រី ហ៊ុន សែន បានផ្លាស់ប្ដូរក្រឹត្យក្រមនៃការប្រកួតប្រជែងតាមរយៈការបោះឆ្នោតដោយស្មើភាពឲ្យទៅជាស្ថានភាពប្រកួតប្រជែងមួយដែលធ្វើឲ្យស្ថាប័នព្រឹទ្ធសភាមិនអាចក្លាយជាស្ថាប័នដែលឆ្លុះបញ្ចាំងពីឆន្ទៈពិតប្រាកដរបស់ប្រជាពលរដ្ឋខ្មែរ។ លោកបន្តថា ស្ទើរតែប្រាកដទៅហើយដែលគណបក្សប្រជាជនកម្ពុជា នឹងទទួលជ័យជម្នះទាំងស្រុងនៅក្នុងការបោះឆ្នោតនេះ ហើយថា ក្តីសង្ឃឹមណាមួយដែលចង់ឲ្យស្ថាប័ននេះលែងជាស្ថាប័នដែលចាំតែប្រថាប់ត្រានោះ គឺបានរលាយសាបសូន្យបាត់អស់ទៅហើយ។
ក្រុមសមាជិកសភាអាស៊ាន ដើម្បីសិទ្ធិមនុស្សម្នាក់ទៀត និងជាសមាជិកសភាហ្វីលីពីន លោក ថម វីឡារីន (Tom Villarin) ថ្លែងថា ការបោះឆ្នោតព្រឹទ្ធសភានេះ គឺគ្មានអ្វីក្រៅតែជាការប៉ុនប៉ងរបស់គណបក្សកាន់អំណាចក្នុងការដណ្ដើមយកការគ្រប់គ្រងស្ថាប័ននេះ តាមរយៈអំពើនៃការលួចប្លន់ផ្នែកនយោបាយយ៉ាងគឃ្លើន។
អង្គការនេះរិះគន់ថា ស្ថាប័នព្រឹទ្ធសភានៅកម្ពុជានេះ គ្រាន់តែជាស្ថាប័នដែលរម្លឹកឲ្យឃើញពីការណ៍ដែលប្រទេសកម្ពុជា ធ្លាក់ផុងចូលកាន់តែជ្រៅទៅក្នុងរបបផ្ដាច់ការទាំងស្រុងតែប៉ុណ្ណោះ៕
 |
| ក្រុមសមាជិកសភាអាស៊ានដើម្បីសិទ្ធិមនុស្ស (APHR) ធ្វើសន្និសីទសារព័ត៌មានផ្សព្វផ្សាយរបាយការណ៍ស្ដីពីបញ្ហាសិទ្ធិមនុស្ស និងនយោបាយនៅកម្ពុជា នាទីក្រុងបាងកក ប្រទេសថៃ ថ្ងៃទី២០ ខែមីនា ឆ្នាំ២០១៧។ Photo courtesy of APHR |
0 ความคิดเห็น: