ចរន្តក្តៅនៅលើបណ្តាញសង្គម ដុតខ្មោចទីងមោងហ៊ុនសែនៗនឹងតាមវាយដល់ផ្ទះ ប្រជាពលរដ្ឋខ្មែរនៅក្រៅប្រទេសឥតខ្លាចសែនគំរាម ចាប់ផ្ដើមនាំគ្នាដុតខ្មោចទីងមោងហ៊ុនសែន!!

ចរន្តក្តៅនៅលើបណ្តាញសង្គម ដុតខ្មោចទីងមោងហ៊ុនសែនៗនឹងតាមវាយដល់ផ្ទះ ប្រជាពលរដ្ឋខ្មែរនៅក្រៅប្រទេសឥតខ្លាចសែនគំរាម ចាប់ផ្ដើមនាំគ្នាដុតខ្មោចទីងមោងហ៊ុនសែន!!

ដូចតាមការគ្រោងទុកនិងប្រកាន់ជំហររបស់សហព័ន្ធខ្មែរ-អូស្ត្រាលីសាជីវកម្ម បានចាប់ផ្តើមដុតទីងមោងរូប ហ៊ុន សែន ហើយបើទោះបីបុរសខ្លាំង ហ៊ុន សែន បានគំរាមតាមវ៉ៃដល់ផ្ទះនោះក៏ដោយ ។

ការដុតទីងមោងរូបលោក ហ៊ុន សែន និង ការច្រៀងចម្រៀងដែលបង្ហាញពីការស្រឡាញ់ជាតិខ្មែរ ពីសំណាក់ប្រជាពលរដ្ឋខ្មែរដែលមិនគាំទ្រការដឹកនាំរបស់លោក ហ៊ុន សែន ខាងលើ បានធ្វើឡើងនៅក្នុងពិធីទទួលស្វាគមន៍ភរិយានិងកូនៗរបស់សពលោកបណ្ឌិត កែម ឡី ដែលបានប្រព្រឹត្តទៅកាលពីថ្ងៃសៅរ៍ម្សិលមិញនេះ ។

មួយថ្ងៃមុនដុតទីងមោងរូបលោកប្រមុខរាជរដ្ឋាភិបាល ពោលគែកាលពីថ្ងៃទី២៣ ខែកុម្ភៈ ឆ្នាំ២០១៨ ចៅហ្វាយក្រុងដែនឌឺណុង (Dandenong) នៃប្រទេសអូស្ត្រាលី ដើមកំណើតខ្មែរ លោក ជា យូហន បានអំពាវនាវអោយពលរដ្ឋខ្មែរ-អូស្ត្រាលី រួមគ្នាធ្វើរូបទីងមោង និង ផ្ដិតរូបថតលោក ហ៊ុន សែន ដើម្បីដុតអោយបានកាន់តែច្រើន។

លោក ជា យូហន អះអាងថា លោកនឹងដាក់ពាក្យប្ដឹងអាជ្ញាធរមានសមត្ថកិច្ចអូស្ត្រាលី ដើម្បីចាត់ការលោក ហ៊ុន សែន តាមច្បាប់ ពេលដែលលោកមកជាន់ដីអូស្ត្រាលី នៅពាក់កណ្ដាលខែមីនា ខាងមុខ។

កាលពីថ្ងៃទី២១ កុម្ភៈ លោក ហ៊ុន សែន បានថ្លែងសារគំរាមយ៉ាងហិង្សានៅចំពោះមុខកម្មកររោងចក្រកាត់ដេររាប់ពាន់នាក់ នៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។ ដោយខឹងសម្បានឹងពលរដ្ឋខ្មែរ-អូស្ត្រាលី ដែលគ្រោងធ្វើបាតុកម្មប្រឆាំងនឹងវត្តមានរបស់លោក ដែលគ្រោងទៅចូលរួមប្រជុំពិសេសអាស៊ាន-អូស្ត្រាលី លោក ហ៊ុន សែន ព្រមានមិនអត់ឱនឲ្យជាដាច់ខាតចំពោះនរណាហ៊ានតវ៉ា រហូតហ៊ានធ្វើរូបទីងមោងតំណាងរូបលោក ហើយហ៊ានដុតរូបទីងមោងនោះចោល។ បើហ៊ានលោកនឹងតាមធ្វើបាបដល់ណាក៏ហ៊ានដែរ៖ «សុំផ្ដាំទៅអាអ្នកត្រៀមធ្វើបាតុកម្ម បើហ៊ានតែធ្វើរូប ហើយដុតរូប ច្បាស់ជាមានរឿងហើយ ហើយខ្ញុំប្ដូរផ្ដាច់ពេលហ្នឹង បើហ៊ានតែធ្វើរូបទីងមោង រូបខ្ញុំយកទៅដុត អញតាមវ៉ៃដល់ផ្ទះប្រាប់ឲ្យហើយ។ អានេះនិយាយឲ្យច្បាស់! សិទ្ធិរបស់ឯងមាន បើសិទ្ធិអ្នកឯងមានដុតគេ គេមានសិទ្ធិវ៉ៃអ្នកឯងវិញ មានទាស់ខុសអី។ អាហ្នឹងសិទ្ធិទៅសិទ្ធិមក។ អ្នកឯងប្រើដល់ហិង្សាលើរូបកាយគេ អ្នកឯងចាត់ទុកថា អាហ្នឹងរូប ហ៊ុន សែន រួចហើយយកទៅដុត។ តាមដល់ផ្ទះ អត់ទេ ក្របួចយកតែម្ដង!»។

នៅក្នុងពិធីសំណេះសំណាលនាពេលនោះដែរ លោកហ៊ុន សែន ក៍ធ្វើការព្រមានជាមុនថា លោកអាចនឹង ជំទាស់កុំអោយចេញសេចក្ដីថ្លែងការណ៍ណាមួយរួច រវាងអាស៊ាន និងអូស្ត្រាលី ។

លោក ហ៊ុន សែន បញ្ជាក់ថា«មិនមែនត្រឹមតែអូស្ត្រាលីមិនអាចគាបសង្កត់កម្ពុជាទេ។ កម្ពុជាសូមដាក់បញ្ហាទុកជាមុន បើសិនជាអ្នកឯងផ្តេសផ្តាស កម្ពុជាតែម្នាក់អាចនឹងធ្វើអោយគាំងទាំងអស់ នូវការចេញសេចក្ដីថ្លែងការណ៍។ របៀបរបបនៃអាស៊ាន វាត្រូវតែមានកុងសង់ស៊ីស រឿងអីដែលត្រូវហោះពីកម្ពុជាទៅអោយគេស្ដីអោយនៅអូស្ត្រាលី? រឿងនេះ អូស្ត្រាលីគួរតែអរគុណកម្ពុជាវិញទេ ដែលមកឡប់ប៊ីកម្ពុជាអោយគាំទ្រការធ្វើការជួបប្រជុំខួបរំលឹកអនុស្សាវរីយ៍ក្នុងទំនាក់ទំនងរវាងអាស៊ាន និងអូស្ត្រាលី … សូមកុំច្រឡំ។»។

ប្រជាពលរដ្ឋខ្មែរ-អូស្ត្រាលី ឯណោះក៏ហួសចិត្តនឹងសម្ដីរបស់លោក ហ៊ុន សែន ខ្លាំងណាស់ដែរ។ តំណាងរាស្ត្រអូស្ត្រាលី ដើមកំណើតខ្មែរ លោក ហុង លីម ហៅលោក ហ៊ុន សែន ថាអាក្រក់ជាងសត្វតិរច្ឆានទៅទៀត។ លោកអះអាងថា លោកនិងពលរដ្ឋខ្មែរអូស្ត្រាលី ដទៃទៀត កំពុងប្រមូលភស្តុតាង និងបកប្រែសម្ដីលោក ហ៊ុន សែន ដែលមានធាតុផ្សំនៃបទល្មើសទៅជាភាសាអង់គ្លេស ដើម្បីដាក់ពាក្យប្ដឹងទៅប៉ូលិសអូស្ត្រាលី និងប៉ូលិសអន្តរជាតិ ដើម្បីចាត់ការលោក ហ៊ុន សែន ទៅតាមផ្លូវច្បាប់ ជាប្រយោជន៍ក្នុងការការពារសិទ្ធិសេរីភាព និងសុវត្ថិភាពជូនប្រទេស និងពលរដ្ឋអូស្ត្រាលីទាំងមូល ។

ពាក់ព័ន្ឋនឹងការគំរាមរបស់លោក ហ៊ុន សែន ខាងលើនេះដែរ អ្នកនាំពាក្យរាជរដ្ឋាភិបាលខ្មែរ លោក ផៃ ស៊ីផាន បានចោទជាសំណួរទៅវិញថា បើចោទថា សម្ដីលោក ហ៊ុន សែន ដែលថានឹងតាមវ៉ៃអ្នកតវ៉ាដល់ផ្ទះ ថាជាអំពើហិង្សា ចុះការដុតរូបលោក ហ៊ុន សែន មិនហិង្សាទេយ៉ាងម៉េច0x017d7 ។

ប៉ុន្មានម៉ោងក្រោយការគំរាមរបស់លោក ហ៊ុន សែននោះរួចមក សមាជិកសភាអូស្ត្រាលី ពីខាងគណបក្សពលករ លោក ម៉ាក បាត់លើរ៍ (Mark Butler) បានថ្លែងសារធ្ងន់ៗ តាមរយៈវីដេអូឃ្លិប ដែលផ្សាយតាមទំព័រហ្វេសប៊ុករបស់លោកដោយពន្យល់ប្រាប់ទៅលោក ហ៊ុន សែន ឲ្យយល់អំពីលទ្ធិប្រជាធិបតេយ្យនៅប្រទេសអូស្ត្រាលី ដោយលោកបញ្ជាក់ថា ពលរដ្ឋខ្មែរ-អូស្ត្រាលី មានសិទ្ធិធ្វើបាតុកម្មដោយសន្តិភាព ដោយគ្មានការគំរាមកំហែងណាមួយបានឡើយ។

លោក ម៉ាក បាត់លើរ៍ ត្រូវបាន RFA ធ្វើការបកប្រែមានខ្លឹមសារថា៖ «កាលពី ២៤ម៉ោងមុននេះ លោក ហ៊ុន សែន បានថ្លែងគំរាមវាយដំជនជាតិអូស្ត្រាលីណាដែលចូលរួមបាតុកម្មប្រឆាំងនឹងវត្តមានលោក ហ៊ុន សែន នៅក្នុងកិច្ចប្រជុំកំពូលអាស៊ាន នៅខែមីនា។ ការគំរាមកំហែងបែបនេះ គឺមិនអាចទទួលយកបានជាដាច់ខាត។

ប្រជាពលរដ្ឋអូស្ត្រាលី បានសម្តែងការមិនពេញចិត្តយ៉ាងខ្លាំងរួចទៅហើយ ចំពោះការបំផ្លាញលទ្ធិប្រជាធិបតេយ្យនៅកម្ពុជា ដូចជាចាប់ប្រធានគណបក្សសង្គ្រោះជាតិ លោក កឹម សុខា ដាក់ពន្ធនាគារ ដោយផ្អែកលើការប្រឌិតបទចោទទៅលើរូបលោក ដោយគ្រាន់តែលោកថ្លែងសារជាសាធារណៈនៅប្រទេសអូស្ត្រាលី កាលពីច្រើនឆ្នាំកន្លងទៅហើយ និងការរម្លាយគណបក្សប្រឆាំង និងការធ្វើទុក្ខបុកម្នេញលើប្រព័ន្ធផ្សព្វផ្សាយឯករាជ្យ និងអង្គការសង្គមស៊ីវិលជាដើម។ ប្រជាពលរដ្ឋអូស្ត្រាលី ពិតជាសម្តែងការហួសចិត្តយ៉ាងខ្លាំងចំពោះទង្វើរបស់លោក ហ៊ុន សែន។ ហេតុដូច្នេះហើយ ទើបមានពលរដ្ឋខ្មែរជាច្រើននឹងចូលរួមតវ៉ាប្រឆាំងវត្តមានលោក ហ៊ុន សែន នៅខែមីនានោះ។ ខ្ញុំសុំផ្ញើសារនេះដោយផ្ទាល់ទៅលោក ហ៊ុន សែន ឲ្យលោកជ្រាបថា ពលរដ្ឋអូស្ត្រាលី ទាំងអស់មានសិទ្ធិពេញលេញក្នុងការធ្វើបាតុកម្មតវ៉ាដោយសន្តិវិធី ដោយគ្មានការគំរាមកំហែងណាមួយនោះឡើយ។ នេះគឺជាមូលដ្ឋានគ្រឹះដ៏រឹងមាំមួយនៃលទ្ធិប្រជាធិបតេយ្យនៅប្រទេសអូស្ត្រាលី។ ដូច្នេះ រដ្ឋាភិបាលអូស្ត្រាលី ត្រូវតែបញ្ជាក់ឲ្យច្បាស់ទៅរបបលោក ហ៊ុន សែន ដើម្បីកុំឲ្យលោក ហ៊ុន សែន នៅមន្ទិលក្នុងរឿងនេះ។ រដ្ឋាភិបាលអូស្ត្រាលី ត្រូវប្រាប់ទៅលោក ហ៊ុន សែន ថា ការគំរាមកំហែងបែបនេះ មិនអាចទទួលយកបានជាដាច់ខាត ហើយជាការចាំបាច់បំផុតដែលលោក ហ៊ុន សែន ត្រូវតែដកការគំរាមវាយបាតុករទៅវិញជាបន្ទាន់»៕

ចំណែកប្រជាពលរដ្ឋខ្មែរ-កាណាដាប្រមាណ ១០០នាក់ មកពីតាមតំបន់នានាក្នុងប្រទេសកាណាដា រួមមាន រដ្ឋធានីអូតាវ៉ា (Ottawa) ក្រុងម៉ុងរ៉េអាល់ (Montreal) និងខេត្តកេប៉ិច (Quebec) កាលពីរសៀលថ្ងៃសៅរ៍ ទី២៤ កុម្ភៈ បានមកជួបជុំគ្នានៅវត្តចម្ការរតនារាម ក្នុងក្រុងឡាវ៉ាល់ (Laval) ស្ថិតនៅភាគខាងជើងទីក្រុងម៉ុងរ៉េអាល់ ដើម្បីរៀបចំពិធីដុតរូបទីងមោង លោក ហ៊ុន សែន។

ក្រុមអ្នកចូលរួមបានរៀបចំពិធីនេះឡើង ដើម្បីសម្ដែងការមិនពេញចិត្ត និងក្ដីខឹងសម្បាររបស់ពួកគេទៅនឹងសារគំរាមរបស់លោក ហ៊ុន សែន កាលពីថ្ងៃទី២១ កុម្ភៈ ដែលលោកបានព្រមានថា នឹងតាមវាយពលរដ្ឋខ្មែរទាំងឡាយណាដែលហ៊ានធ្វើបាតុកម្មប្រឆាំងរូបលោក ឬដុតទីងមោងរូបលោក នៅពេលលោកទៅចូលរួមកិច្ចប្រជុំកំពូលអូស្ត្រាលី-អាស៊ាន នៅប្រទេសអូស្ត្រាលី នាពាក់កណ្តាលខែមីនាខាងមុខនេះ។

ពិធីដុតរូបទីងមោងលោក ហ៊ុន សែន នេះ ដឹកនាំដោយចលនានារីខ្មែរម៉ុងរ៉េអាល់កាណាដា និងមានការចូលរួមពីសំណាក់ព្រះសង្ឃមកពីតាមបណ្ដាវត្តអារាមនានា ក្នុងក្រុងម៉ុងរ៉េអាល់ សហព័ន្ធខ្មែរកម្ពុជាក្រោមប្រចាំប្រទេសកាណាដា អ្នកគាំទ្រចលនាសង្គ្រោះជាតិ និងពលរដ្ឋខ្មែរកាណាដាជាច្រើនរូប បើទោះជាអាកាសធាតុនៅទីនោះមានលក្ខណៈត្រជាក់ខ្លាំងយ៉ាងណាក៏ដោយ។ ក្រុមអ្នកចូលរួមថា ពួកគេមិនខ្លាចរអាទៅនឹងសារគំរាមកំហែងរបស់លោក ហ៊ុន សែន នេះទេ។ មុនដុតរូបទីងមោងលោក ហ៊ុន សែន នេះ ក្រុមអ្នកចូលរួមខ្លះ បាននាំគ្នាស្រែកដាក់បណ្ដាសាលោក ហ៊ុន សែន ដោយខ្លះថាលោក ហ៊ុន សែន ជាជនក្បត់ជាតិ ជាឃាតកសម្លាប់ក្រុមអ្នកប្រឆាំង ក្រុមអ្នកប្រជាធិបតេយ្យ និងពលរដ្ឋស្លូតត្រង់ជាដើម។

ក្រុមអ្នកចូលរួមខ្លះទៀត បាននាំគ្នាយកដុំទឹកកកគប់សំដៅទៅរូបទីងមោង លោក ហ៊ុន សែន ខណៈអ្នកខ្លះទៀតនាំគ្នាយកដំបងឈើវាយសំពងរូបទីងមោងលោក ហ៊ុន សែននោះ ដើម្បីជាការសម្ដែងនូវអារម្មណ៍មិនពេញចិត្តរបស់ពួកគេ។

តំណាងក្រុមអ្នកគាំទ្រចលនាសង្គ្រោះជាតិ ប្រចាំប្រទេសកាណាដាម្នាក់ គឺលោក នួន នរា ថ្លែងប្រាប់អាស៊ីសេរីកាលពីថ្ងៃអាទិត្យទី២៥ កុម្ភៈ ថា ពិធីដុតរូបទីងមោងលោក ហ៊ុន សែន នេះ ធ្វើឡើងដោយសារពួកគាត់មានភាពឈឺចាប់នឹងអំពើអយុត្តិធម៌សង្គម និងការដឹកនាំតាមរបៀបបែបផ្ដាច់ការឯកបក្សរបស់លោក ហ៊ុន សែន ដែលចុងក្រោយនេះបានរម្លាយប្រជាធិបតេយ្យជាស្ថាពរនៅកម្ពុជា។ លោកថា ពលរដ្ឋខ្មែរនៅកាណាដា មិនខ្លាចរអារនឹងសារគំរាមកំហែងរបស់អតីតកម្មាភិបាលជាន់ខ្ពស់ខ្មែរក្រហមនេះឡើយ៖ «គាត់អត់ខ្លាចទេ ហើយជាពិសេសបងប្អូនយើងខ្មែរកម្ពុជាក្រោម...។ គាត់ប្រកាសដាច់អហង្ការថា គាត់មិនខ្លាចជាដាច់ខាត។ មានលោកដែលជាប្រធានសហព័ន្ធខ្មែរកម្ពុជាក្រោមពិភពលោក សាខាម៉ុងរ៉េអាល់ហ្នឹង គាត់ឡើងប្រកាសនិយាយក្នុងមេក្រូ គាត់ថា គាត់ឲ្យអាសយដ្ឋានគាត់ទៀត។ គាត់ថា គាត់នឹងទៅដុតជាមួយបងប្អូនចលនាស្ត្រីហ្នឹង ហើយគាត់ពាក់អាសយដ្ឋានគាត់។ គាត់ថា បើចង់មក... មកសម្លាប់គាត់ ក៏មកសម្លាប់គាត់ទៅ នៅផ្ទះគាត់។ គាត់ឲ្យអាសយដ្ឋាន។ ដូច្នេះ គឺថាបងប្អូនយើងពុះពោរមែនទែន។ ជាពិសេសស្ត្រីហ្នឹងក៏គាត់មិនខ្លាចដែរ ពីព្រោះយើងអស់មានអីទៀតហើយ គាត់ថាអញ្ចឹង។ យើងមានតែការតស៊ូ ដូច្នេះបើថា នៅតែខ្លាចគេសម្លុតទៀត អាហ្នឹង យើងអត់មានធ្វើដំណើរទៅមុខបានទេ»។

មុនពេលពិធីដុតរូបទីងមោងលោក ហ៊ុន សែន នេះ ក្រុមអ្នកចូលរួមក៏បានរៀបចំធ្វើវេទិកាសាធារណៈមួយអំពីយុទ្ធនាការចលនាសង្គ្រោះជាតិ ដែលមានការចូលរួមពីសំណាក់តំណាងរាស្ត្រគណបក្សសង្គ្រោះជាតិ លោក គង់ សភា និងលោក សោ ចាន់ដេត និងមន្ត្រីជាន់ខ្ពស់ចលនាសង្គ្រោះជាតិប្រចាំប្រទេសកាណាដាជាច្រើនរូប។ ពួកគេបានអំពាវឲ្យពលរដ្ឋនៅប្រទេសកម្ពុជា គាំទ្រចលនាគណបក្សសង្គ្រោះជាតិឲ្យបានមោះមុត និងចូលរួមឲ្យបានយ៉ាងសកម្មក្នុងការធ្វើពហិការមិនទិញទឹកបរិសុទ្ធវីតាល់ ទឹកសុទ្ធអារុណា រួមទាំងផលិតផលផ្សេងៗទៀត ដែលជាភាគហ៊ុនរបស់មន្ត្រីជាន់ខ្ពស់ក្នុងរបបលោក ហ៊ុន សែន។

លោកថា ក្រុមចលនានារីខ្មែរម៉ុងរ៉េអាល់កាណាដា បច្ចុប្បន្ន កំពុងធ្វើរូបទីងមោងលោក ហ៊ុន សែន ឲ្យបានច្រើនបន្ថែមទៀត ដើម្បីត្រៀមរៀបចំពិធីដុតរូបទីងមោងលោក ហ៊ុន សែន បន្ថែមទៀតនាពេលអនាគត។ លោកផ្តាំផ្ញើឲ្យពលរដ្ឋខ្មែរមកពីគ្រប់មជ្ឈដ្ឋានទាំងអស់ ត្រូវចេះសាមគ្គីគ្នាជាធ្លុងមួយ ដើម្បីកម្ចាត់របបផ្ដាច់ការលោក ហ៊ុន សែន៕

ប្រភព៖ RFA Khmer