អតីតប្រធានគណបក្សសង្គ្រោះជាតិ លោក សម រង្ស៊ី ថ្លែងថា លោកមិនមានការភ្ញាក់ផ្អើលអ្វីទេចំពោះសេចក្ដីសម្រេចរបស់តុលាការរបបក្រុងភ្នំពេញ រឹបអូសទ្រព្យសម្បត្តិរបស់លោកនោះ។ លោកចាត់ទុកការសម្រេចបែបនេះ គឺជាផ្នែកមួយនៃសំណុំរឿងនយោបាយដែលរបបលោក ហ៊ុន សែន បានសាងឡើងដើម្បីធ្វើទុក្ខបុកម្នេញរូបលោក ដែលលោកបានចេញមុខខ្លាំងជាងគេប្រឆាំងនឹងអំណាចផ្ដាច់ការ និងពុករលួយដូចសព្វថ្ងៃនេះ។
លោក សម រង្ស៊ី នៅតែរក្សាជំហរដដែលថា លោកមិនតក់ស្លុតអ្វីឡើយចំពោះដីការក្សាការពាររឹបអូសទ្រព្យសម្បត្តិរួបលោកនោះ ដោយលោកអះអាងថា លោកមិនមែនជាមនុស្សសម្ភារៈនិយមទេ ដូចជាទ្រព្យសម្បត្តិ លុយកាក់ និងបុណ្យសក្ដិនោះ មិនមែនជាអ្វីដែលលោកស្វែងរកក្នុងការតស៊ូរបស់លោកអស់រយៈពេល ២៥ឆ្នាំកន្លងមកនេះទេ។
នៅក្នុងសារដែលលោក សម រង្ស៊ី ផ្ញើជូនមកអាស៊ីសេរី កាលពីថ្ងៃទី២៧ ខែកុម្ភៈ លោកបានបញ្ជាក់ថា លោកបានសម្រេចវិលត្រឡប់ពីប្រទេសបារាំង មករស់នៅប្រទេសកម្ពុជាវិញ នៅឆ្នាំ១៩៩២ លោកបានសម្រេចចិត្តរួចទៅហើយតាំងពីពេលនោះមកថា លោកមកតស៊ូដើម្បីស្រោចស្រង់មាតុភូមិរបស់លោកដោយគ្មានបំណងចង់បានអ្វីពីប្រទេសកម្ពុជា សម្រាប់ខ្លួនលោក និងក្រុមគ្រួសារលោកឡើយ។ តែអ្វីៗដែលលោកមានទាំងអស់ តាំងពីយូរយារមកហើយ គឺលោករីករាយយកមកផ្ដល់ជូនមាតុភូមិរបស់លោក។
លោក សម រង្ស៊ី បានប្រកាសដូច្នេះ ជាការឆ្លើយតបទៅតុលាការក្រុងភ្នំពេញ បានចេញដីការឹបអូសទ្រព្យសម្បត្តិរបស់លោក និងទីស្នាក់ការកណ្ដាលគណបក្សសង្គ្រោះជាតិ ជាបណ្ដោះអាសន្នសិនក្នុងសំណុំរឿងលោក សម រង្ស៊ី ចាញ់ក្ដីលោក ហ៊ុន សែន និងលោក ហេង សំរិន កាលពីពេលថ្មីៗនេះ។ ប៉ុន្តែមន្ត្រីបក្សប្រឆាំងថា ជារឿងគួរឲ្យអស់សំណើចដែលលោក ហ៊ុន សែន ខឹងគោបែរវាយរទេះបែបនេះទៅវិញ។
ចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ បានចេញដីការក្សាការពារដោយសំអាងលើលោក សម រង្ស៊ី ចាញ់ក្ដីលោក ហ៊ុន សែន និងលោក ហេង សំរិន កាលពីថ្ងៃទី២៣ កុម្ភៈ ដែលមានលោក គី តិច ជាមេធាវីដើមបណ្ដឹង បានប្ដឹងមកតុលាការទាមទារជំងឺចិត្តពីលោក សម រង្ស៊ី។
បន្ថែមពីនេះ អតីតប្រធានគណបក្សសង្គ្រោះជាតិ លោក សម រង្ស៊ី ធ្លាប់បានឲ្យអាស៊ីសេរីដឹងថា តុលាការសម្រេចឲ្យលោកចាញ់ក្តីលោក ហ៊ុន សែន ពីបទបរិហារកេរ្តិ៍ថា លោកមិនខ្វល់នឹងសាលក្រមរបស់តុលាការដែលផ្ដន្ទាទោសលោកឲ្យបង់ប្រាក់ជូនលោកនាយករដ្ឋមន្ត្រី ហ៊ុន សែន រហូតដល់រាប់លានដុល្លារ ក្នុងបណ្ដឹងបរិហារកេរ្តិ៍ដែលលោក ហ៊ុន សែន ប្ដឹងលោកនោះទេ ព្រោះលោកចាត់ទុកថា មន្ត្រីតុលាការកម្ពុជា គ្មានឯករាជ្យ និងមិនសូវដឹងអ្វីនោះទេ ដោយធ្វើអ្វីៗតាមតែបញ្ជារបស់លោក ហ៊ុន សែន និងថ្នាក់លើ៖ «»។
នៅក្នុងសាររបស់លោក សម រង្ស៊ី កាលពីថ្ងៃទី២៧ ខែកុម្ភៈ ឲ្យដឹងទៀតថា កាលពីលោកធ្វើជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុចន្លោះឆ្នាំ១៩៩៣-១៩៩៤ លោកមិនបានទាមទារចង់បានអ្វីសម្រាប់លោក ឬគ្រួសារឡើយ សូម្បីតែផ្ទះសម្បែង ដែលឪពុកម្ដាយរបស់លោកបានកសាងនៅប្រទេសកម្ពុជា មុនឆ្នាំ១៩៧៥ ក៏លោកមិនដែលអើពើដែរ។ ផ្ទះសម្បែងរបស់លោកសព្វថ្ងៃនៅទីក្រុងភ្នំពេញ និងទីស្នាក់ការរបស់គណបក្សសង្គ្រោះជាតិនោះ គឺបានមកពីញើសឈាមរបស់លោក និងញើសឈាមអ្នកគាំទ្រគណបក្សសង្គ្រោះជាតិ និងគណបក្ស សម រង្ស៊ី កាលពីមុន។ លោកអះអាងថា លោកមិនដែលពាក់ព័ន្ធក្នុងអំពើពុករលួយ គឺទង្វើលួចជាតិ ប្លន់ជាតិ និងបំផ្លាញជាតិ ឬក៏ទង្វើធ្វើបាប ជំរិត ឬកេងប្រវ័ញ្ចប្រជារាស្ត្រម្ដងណាឡើយ។
លោក សម រង្ស៊ី សង្កត់ទៀតថា លោកមិនចាប់អារម្មណ៍នឹងតុលាការអាយ៉ងរបស់លោក ហ៊ុន សែន និងគណបក្សរបស់លោក រឹបអូសទ្រព្យសម្បត្តិនេះទេ ពីព្រោះទង្វើបែបនេះវាមិនប៉ះពាល់ដល់ជីវភាពរស់នៅ និងកម្លាំងចិត្តតស៊ូរបស់លោកឡើយ។ តែអ្វីដែលលោកខ្វល់ខ្វាយក្នុងចិត្តក្រៃលែង គឺទង្វើរបស់អ្នកមានអំណាច និងអ្នកមានលុយពុករលួយយ៉ាងសន្ធឹកសន្ធាប់ ដែលឃុបឃិតជាមួយតុលាការអាយ៉ងរបស់លោក ហ៊ុន សែន ដើម្បីរឹបអូសទ្រព្យសម្បត្តិ ដីធ្លី និងផ្ទះសម្បែងរបស់ប្រជារាស្ត្រតូចតាច ប្រជារាស្ត្រក្រីក្រ ប្រជារាស្ត្រស្លូតត្រង់ ដែលរងគ្រោះដោយអំពើអយុត្តិធម៌យ៉ាងធ្ងន់ធ្ងរពីសំណាក់រដ្ឋអំណាចសព្វថ្ងៃ។ ប្រទេសកម្ពុជា សព្វថ្ងៃ ពោរពេញដោយអំពើអយុត្តិធម៌ដែលធ្វើឲ្យជនរងគ្រោះរាប់លាននាក់ជួបការលំបាកវេទនាក្រៃលែងក្នុងជីវភាពរស់នៅប្រចាំថ្ងៃ។
ដីការក្សាការពារបានចេញកាលពីថ្ងៃទី២៦ ខែកុម្ភៈ ដែលត្រូវផ្សព្វផ្សាយថ្ងៃទី២៧ ខែកុម្ភៈ នេះ សម្រេចរឹបអូសទ្រព្យសម្បត្តិរបស់លោក សម រង្ស៊ី ជាដី និងអគារនៃទីស្នាក់ការកណ្ដាលគណបក្សសង្គ្រោះជាតិ មានទីតាំងស្ថិតនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ត្រូវលោក គី តិច លើកឡើងក្នុងពាក្យបណ្ដឹងរបស់ខ្លួនថា ដើម្បីជំរុញឲ្យលោក សម រង្ស៊ី សងបំណុលជាង ៤.២០០លានរៀល ឬជាង ១លានដុល្លារ ឲ្យកូនក្ដីរបស់លោក គឺលោក ហ៊ុន សែន និងលោក ហេង សំរិន ក្រោយពីតុលាការគ្រប់ជាន់ថ្នាក់បានសម្រេច។
មន្ត្រីជាន់ខ្ពស់គណបក្សសង្គ្រោះជាតិ លោក ហ៊ីង សុខសាន្ត យល់ថា នេះគ្រាន់តែជាការបង្ហាញឲ្យមហាជនឃើញថា លោក ហ៊ុន សែន ខ្លាំងកាចសាហាវ និងអាចធ្វើអ្វីបានគ្រប់យ៉ាងលើគណបក្សសង្គ្រោះជាតិ។ ប៉ុន្តែ ប្រធានចលនាយុវជនគណបក្សប្រឆាំងរូបនេះយល់ថា អ្វីដែលបក្សកាន់អំណាចកំពុងធ្វើទុក្ខបុកម្នេញលើបក្សប្រឆាំង គឺមិនបានផលទេ៖ «»។
លោក ហ៊ុន សែន ដែលមិនធ្លាប់ចាញ់ក្តីលោក សម រង្ស៊ី នៅក្នុងតុលាការនៃរបបរបស់លោកបាននិយាយជាសាធារណៈថា បើលោក សម រង្ស៊ី គ្មានលុយសងជំងឺចិត្តលោកទេ លោកទាមទាររឹបអូសទីស្នាក់ការគណបក្សសង្គ្រោះជាតិ ដែលលោកដឹងថា ទីស្នាក់ការនោះជាកម្មសិទ្ធិរបស់លោក សម រង្ស៊ី។
អ្នកវិភាគនយោបាយឯករាជ្យ លោកបណ្ឌិត ឡៅ ម៉ុងហៃ យល់ថា វិធានការរបស់តុលាការនៅពេលនេះ គឺបង្ហាញឲ្យឃើញកាន់តែច្បាស់ថា តុលាការកម្ពុជា មិនមានឯករាជ្យ។ លោកបន្តថា រូបភាពនេះគឺរុញច្រានឲ្យវិបត្តិនយោបាយកាន់តែបន្តក្ដៅគគុកទៅមុខទៀត ដែលហាក់បីដូចជាមានសង្គ្រាមដោយមិនប្រើអាវុធដូច្នោះដែរ៖ «»។
មកទល់ពេលនេះ លោក សម រង្ស៊ី បានហ៊ុមព័ទ្ធបណ្ដឹង និងចាញ់ក្ដីលោក ហ៊ុន សែន និងបក្ខពួករបស់លោកជិត ១០បណ្ដឹង ដែលភាគច្រើនជាបណ្ដឹងបរិហារកេរ្តិ៍ ដូចជាកាលពីចុងឆ្នាំ២០១៧ តុលាការក្រុងភ្នំពេញ ក៏សម្រេចឲ្យលោក សម រង្ស៊ី សងជំងឺចិត្តលោក ហ៊ុន សែន ១លានដុល្លារ ក្នុងសំណុំរឿងមួយផ្សេងទៀត គឺសំណុំរឿងដែលចោទលោក សម រង្ស៊ី និយាយថា លោក ហ៊ុន សែន បានសូកប៉ាន់កញ្ញា ធី សុវណ្ណថា ចំនួន ១លានដុល្លារ ជាថ្នូរនឹងការវាយប្រហារបក្សប្រឆាំង បន្ទាប់ពីនាងឈប់គាំទ្របក្សសង្គ្រោះជាតិ ហើយងាកមកស្និទ្ធជាមួយលោក ហ៊ុន សែន។ ចំណែកសំណុំរឿងមួយទៀត តុលាការបានកាត់ក្ដីអោយលោក ហេង សំរិន ឈ្នះក្ដីលោក សម រង្ស៊ី ពាក់ព័ន្ធករណីបទបរិហារកេរ្តិ៍លោក ហេង សំរិន តាមរយៈបណ្ដាញសង្គមហ្វេសប៊ុក (Facebook) កាលពីចុងឆ្នាំ២០១៥ ដោយចោទលោក ហេង សំ រិន ថាជាអ្នកកាត់ទោសសម្ដេច សីហនុ ជាជនក្បត់ជាតិជាដើម។
សកម្មជនសិទ្ធិមនុស្សលើកឡើងថា របបរបស់ក្រុងភ្នំពេញ បានរឹបអូសផ្ទះសម្បែង ដីធ្លីប្រជាពលរដ្ឋ ទោះបីជាទ្រព្យសម្បត្តិអតីតមេបក្សប្រឆាំង និងពលរដ្ឋសាមញ្ញនេះមិនមែនជារឿងថ្មីទេ ពីមួយឆ្នាំទៅមួយឆ្នាំប្រជាពលរដ្ឋរងនូវទឹកភ្នែកស្ទើរតែគ្រប់ខែត្រក្រុង ដោយករណីខ្លះតុលាការបានចេញដីការក្សាការពារ រឹបអូសទ្រព្យសម្បត្តិពលរដ្ឋ និងករណីខ្លះ ក្រុមហ៊ុនដែលមានអ្នកមានអំណាចនៅពីក្រោយខ្នង បានឈូឆាយផ្ទះសម្បែងរបស់ពលរដ្ឋ ដោយគ្មានការឆ្លងកាត់ពីតុលាការក៏មាន ដូចជានៅតំបន់បុរីកីឡា និងនៅបឹងកក់ ជាដើម។ លោក សម រង្ស៊ី ប្ដេជ្ញាថា លោកនឹងខិតខំតស៊ូកាន់តែខ្លាំងក្លាឡើងថែមទៀត ដើម្បីបញ្ចប់អំណាចផ្ដាច់ការដ៏ព្រៃផ្សៃសព្វថ្ងៃ ក្នុងគោលបំណងផ្ដល់សេរីភាព និងយុត្តិធម៌ជូនប្រជារាស្ត្រខ្មែរទាំងមូល៕
ប្រភព៖ វិទ្យុអាស៊ីសេរី ចុចស្ដាប់សំឡេង
